L'Amandoin de Bonassêua, 1858/Barselletta. Bello vedde!
| ←Barselletta. No tocchæ in to beneitin | L'Amandoin de Bonassêua, 1858 Barselletta. Bello vedde! |
Complimento→ |
| da-a Libraja de stoia moderna e contempoannia de Romma |
BARSELLETTA
Bello vedde a despeazion
Passeggiâ pinn-a de ton,
E indoâ a pilloa da miseja
Cö caprissio da matteja!
Bello vedde çerta gente
Sempre in gïo continûamente,[sic]
Sempre belli e pëtenæ,
Sempre ricchi de dinæ!
Bello vedde ûnn-a platëa
Tûtta all'aja pe cioccâ,
Pe applaudî ûnn-a corifëa
Perdi carne impastettâ,
Ch'a se rïe di bulibbæ
Lì co-i massi preparæ
Che n'aspëtan che o momento
Tûtti attenti apprêuvo a lè
Che pe ûn gran ringraziamento
A ghe mostre ûn pö o panê!
Bello vedde tûtti i giorni
Verso l'alba in çittadinn-a
Spantegâse pe-i dintorni
De campagne e da collinn-a
Cö chirûrgo, co-i paddrin,
Co-i secondi , cö becchin
I dûellanti valorosi
De sti tempi corraggiosi
Che fan testo pe lavâ
O rossô d'ûnn-a mascâ
Co'ànn-a bella colazion
Da-o Rubädo o da-o Bascion!
Bello vedde in to ballâ
Tanti quassi de ragasse
Spantegâse tûtti in strasse,
Bello aveìle da aspëtâ
Quande scappan da brassetto
Pe-a piccaggia, pe-o frexetto,
Pe vortâse a discorrî
Con l'amiga do vestî
Do galante, do ti sæ!
Bello vedde a societæ
Sempre in maschera vestïa
E insûgâ d'ipocrixïa,
E e scignôe quande se bäxan,
E e ragasse quande täxan,
Quande schivan i majæ!
Bello vedde i gren dinæ
Dappertûtto rispettæ!
Bello vedde questo mondo
Diventâ sempre ciù riondo,
Bello vedde, Cittadin,
Finalmente l'Amandoin
Criticôu pe ûn pö coddin
Perchè amante da veitæ . . .
– Lascio stâ, no n'ho ciû coæ!