Esopo Zeneize 1822/O Cavallo, o Bêu, l'Agnello, e l'Aze
| ←O Gallo, e o Diamante | Esopo Zeneize de O Cavallo, o Bêu, l'Agnello, e l'Aze |
O Rætin→ |
| Zena, Stampaja Pagan, 1822 - Primma ediçion e en stæti reixi con êu e ôu. In notta e diferençe co' l'ediçion do 1846. |
O Cavallo, o Bêu, l'Agnello, e l'Aze.
Quattro bestie d’ûmô differente,
Un Cavallo superbo, e arrogante,
Un Agnello mansûeto, e paziente,
Un Bêu grosso con aja importante,
E un bell’Aze di ciù stramezûæ
Se trovon fra lô insemme affammæ,
E corrindo d’in bosco in deserto,
E chinnando d’in monte in ciannûa
Comme o Lô, ma con passo ciù çerto,
Tutti andavan çercando ventûa
Per trovâse qualcosa adattâ
A-i sò denti de poêi roziggiâ;
Stanchi, e frûsti da tanto camin,
Dä gran famme arraggiæ comme chen,
Finalmente da lonxi scrovin
Un-na villa in t’un grasso terren,
Pin-na d’erboi, de vigna, e de biava,
C’un gran campo de fen ch’incantava.
Da-o piaxei tutti allegri, e contenti
Caminavan, che paivan[1] giganti,
Perleccandose, e affiando zà i denti,
Ognun voeiva arrivâghe ciù avanti
Per levâse o roziggio da-o coêu,
E saziâse do megio, ch’o pêu;
Gh’arrivon, ma reston ben mincioin
Quando viddan sta villa mûaggiâ
Da un gran zerbo de brûghi, e spinoin,
Da un fossôu tutt’intorno bagnâ[2],
E che stava in scia porta un Villan
C’un baston pin de gruppi pe-a man,
O Cavallo de vedde o baston
O sentì un non sò che in to sò coêu
Chi l’angoscia, e ghe mette ghignon,
Passa a famme, e andâ avanti o no vêu,
L’Agnelletto pe-a puïa de bacchæ
O tremava meschin criando bæ,
O Bêu stanco o fremeiva, e impaziente
O pensava fra lé titûbante
S’o dovesse passâ.... ma prudente
Riflettendo in sciò bacco pezante
O decise da asperto frà lé
De tornà a denti sciûti inderré;
L’Aze in cangio, sempre Aze, e teston,
Senza ninte riflette, e pensâ
O fà un säto, e và incontro a-o baston...
O Villan se ghe mette a sbraggiâ:
« Vanni via , brûtta bestia, o t'ammasso »
Ma testardo o stà lì l’azenasso;
Quello prima ö minaccia... poi picca
Legnæ da orbi trà muro, e trà collo,
Ch’o fa sangue, ma l’Aze ghe slicca
Cäsci abbrettio, e và zù a rompicollo
In ta villa scrollando e bacchæ,
Che pâ manco ch’o e aggie piggiæ,
Intrôu drento o fracassa, o subissa
Da per tutto co-e sampe ond’o passa,
E co-i denti o l’arranca, e menissa
L’uga, e o fen con a biava o pestassa,
E çernendo[3] o ciù bello, e o ciù bon
Pâ, ch’o digghe, son mi chi o patron.
Sazio, e moscio o s’accuega in scie l’erba,
E reverso o se mette a ragniâ
Ai compagni con aja superba,
Che invidiosi[4] o stavan ammiâ[5]:
Imparæ, Potronassi, da mì,
Se fà sorte a sto mondo coscì.