Due brocche de viovetta/Zena vegia
| ←Frasche de Mazzo | Due brocche de viovetta de Zena vegia |
Da-o Garbo→ |
| ed. www.liberliber.it 2010 |
Me piaxe a vegia Zena, – dove se trêuva ancon
comme ûn sentô da muffa do tempo; – dove son
palassi e case, quæxi sens'äja e sensa lûxe,
che çerto s'arregordan dell'Abbôu e do Dûxe:
cacciæ là pe-i caroggi, son freide e alluveghïe....
ma, quanta Storia contan quelli moîn, quelle prïe!
Da quelle mûage vegie, sgrezze, smangiæ da-o mæn,
da-e colonne, da-i porteghi, da-i barcoîn, da-i abbæn,
da-i marmi gianchi e neigri, che spariscian man man,
sento comme ûnn-a voxe chi vegne da lontan;
e i battuzi de færo muæ ancon da-e barconee
fan vegnî in mente i guarda-ciusme, e remme, e galee….
L'é bello, quande Zena sotto ä lûxe tranquilla
da lûnn-a a dorme, e ninte mescia, e nisciûn ciù silla,
andâ, soli, fûmmando, pe-a çittæ vegia, e o passo
fermâ a sta porta, a quella gexa, a questo palasso:
pä che da çerte sale, ricche d'affreschi e marmi
m'arrive a-e oëgie ancon quæxi ûn fracasso d'armi.
e mentre a sto fracasso mi l'oëgia avido porzo,
chì me fa segno ûn pûtto, là me ciamma ûn San Zorzo,
ûn pö ciù in sciù ûnn-a lögia divisa a colonnin,
sotta ûn bassorilievo, lavoro do Gaggin,
in ti fraveghi o Piola.... Poveo Piola, ûnn-a man
vile, a smorsava tanta lûxe d'arte in Sarzan!....
A ogni canto, a ogni gommio de stradda, ûnn-a memoja:
ecco i Grimaldi e i Spinola e i Cattaneo, ecco i Doja.
Oh! comme nette, – e semplici linee de San Mattê,
staccan da-o fondo e spiccan sotto a cappa do çê!
Oh! o l'é bello San Loenso – in te quell'öe piccinn-e –
sensa paolotti, sensa prævi, sensa beghinn-e!