Due brocche de viovetta/II. O Marcheize
| ←E Maschere - I. Pantalon | Due brocche de viovetta de E Maschere - II. O Marcheize |
E Maschere - III. O Paisan→ |
| ed. www.liberliber.it 2010 |
O Marcheize
Per Bacco! l'é straniscimo quello che sento e veddo;
e a i mæ êuggi e a-e oregge stesse quæxi non creddo:
veriscimo! son anni... quanti? guardemmo: oh molti,
che non discendo in ciassa: che costûmmi! che volti!
che linguaggio! non trêuvo ciù o dovûto rispetto
a ûn mæ pari, l'inchin profondo... oh! là, cospetto,
che maniera l'é questa? diggo, ûn pö de creansa:
a quanto sembra semmo tûtt'ûn: no ciù distansa
tra marcheize e plebeo, tra nobiltæ e marmaggia...
poscibile che a Zena comande oggi a canaggia?
a Zena dove ûn tempo tûtti o cappello in man
aveivan se o marcheize vedeivan da lontan,
e se doggiava a schenn-a davanti a-o so blason?...
Per Bacco! l'é straniscimo; me tocco se ghe son.
L'è cangiôu tûtto – a mûxica; co-i personaggi a scena:...
son ûn pescio fêua d'ægua: – Zena a no l'é ciù Zena.
Bezêugna, in mëzo a questa gaggia de matti, o sento,
o moddo de pensâ cangiâ cö vestimento.
Föse solo per l'abito! – rinunzio a fâ bombæa
de sta marscinn-a tûtta frixi recammi e sæa,
do spadin, da perrûcca, da cöa – tûtto pasiensa!
Ma o moddo de pensâ?... Capperi! o fior, l'essensa,
quello che dà ûn carattere, quello che gh'é de mëgio?
Non sarà mai che ûn nobile veo, do portego vegio,
da-i so antenati o deroghe finn-a a sto punto. – C...o!
Mëgio tornâ in ti fondi do storico palasso.
O sangue blêu o l'ha perso a lite, e oggi o marcheize
o no l'é ciù che ûn tipo... de maschera Zeneize.