Donaver Antologia 1910/Sghiribisso
| Sghiribisso de , a cua de Federigo Donaver |
torna a l'endexo→ |
| da l'Antologia do Donaver do 1910, sença indicaçion tipograffica. |
O mondo da giornâ
Faeto ä reversa o se pêu ben ciammâ,
Perchè ogni pö se vedde
In tûtto e da per tûtto
De cöse stravaganti da no credde.
Se dixe bello a-o brûtto,
A-o rosso verde, a-o gianco cô d'inciostro,
E a-o vostro se ghe dixe sempre nostro,
Chi perde guägna a-e liti comme a-i zêughi,
E l’è presto decisa ogni question,
Ché chi sbraggia ciú forte ha ciù raxon.
Ûnn-a votta da-i chêughi
I tötani in ta poëla se frizzeiva,
Aoa o tötano incangio frizza i chêughi.
A veitae con sccettessa se dixeiva,
Aoa böxie vellae,
E per baxi se ciocca de maschae.
Regnava a bonn-a fede co-a giûstizia,
Aoa inganno e malizia,
A modestia e a saviessa
Diventan vizii senza a sfrontatessa.
O conjûgale amô co-a fedeltae
Son derisi e fischiae;
A vigilanza sorve i sô figgiêu
Son antigagge de bandîse anchêu,
Tempo perso l’é a bonn-a edûcazion,
Beghin se dixe a chi ha da religion,
Chi va drïto va storto,
Senza cabale e intrighi n’intrae in porto.
Oh tempi stravaganti e mascarsoin!
Che pe ëse bravi s’ha da ëse filloin!