Donaver Antologia 1910/A Ugo Bassi

by Martin Piaggio

A Ugo Bassi de Martin Piaggio, a cua de Federigo Donaver

torna a l'endexo→

da l'Antologia do Donaver do 1910, sença indicaçion tipograffica.

A UGO BASSI.

Salve Bassi! te saluo,
Ûgo salve! ben vegnûo;
Zena esûlta in questo giorno
Pe-o felice tò ritorno;
E quell’infinita ûdiensa,
Chi sfondava a Cattedrale
Per vegnî con impaziensa
A-o tò gran quareximale,
(Do quae sento ancon chi passa
O reciocco in gëxa e in ciassa)
A giöisce da-o piaxei
Da sentîte e vedde poei.

Tanti poeti han celebrôu
E tò lodi in vario stile;
Çento trombe t’han portôu,
Con raxon, da Battro a Tile,
E mi mûtto son restôu?

Ma suppliö a tanta mancansa,
Proffittiö da circostansa,

E in vernacolo dialetto,
Cö mae pöveo chitarrin,
Sparâ vêuggio o mae scciûppetto,
E diö.... Cöse?.. .. Oh mi meschin!.....

Gho vorriae a venn-a do Tasso,
L’eloquensa de Çiçeon,
E o savei de Salomon,
Per poei fâ d’ûn Ugo Basso
Quell’elogio ben tesciûo
A-[i] sò meriti dovûo.

Oratô sacro finïo,
Pin de tûtti i doni^[1] de Dio,
Apostolico, evangelico,
Dottô, poeta, enciclopedico,
Fûlminante, commovente,
Consolante, persuadente. ..

Voxe, gesto, portamento,
Eloquensa, sentimento
Fûrô sacro, devoismo,
Divin fêugo, elettricismo!....

A voi tûtti me n’appello,
Uditoî, che l’ei sentïo;
A-o divoto sesso bello,
A-o vizioso convertïo,
A-o corretto maldicente
E a-o confûso miscredente,
Tûtti ... tûtti...! réisi a Dio.

Me o conferma quell’affluensa
Imponente o palpitante,

Quella scena edificante
De personn-e in concorrensa,
D’ogni stato, sesso, etae,
Biechi, pövei, titolae,
Idïoti, ommi de sciensa,
Lagrimanti ä sò partensa,
E cacciando, per addii,
Di lunghiscimi sospii!!...

Oh distacco doloroso!
Oh tragitto rincrescioso!
Tormentosa lontanansa!...

No ghe resta che a speranza
Do ritorno!... ma sciallaeve,
Tripûdiae, che o sospirôu
Vostro Bassi o l’è arrivôu,
E o porrieì torna sentî....

A San Bertomê corrî,
Con piggiâ a stradda ciù drita,
Dunque posto no trovieì,
E ascoltâ ciù no porrieì
O famoso Barnabita,
Che veddiemo torna andâ,
(Forse per mai ciù tornâ!)
Pin do gloria, in ûmiltae,
Tûtto allegro in povertae,
Cö mantello pe equipaggio,
E i dinae solo pe o viaggio.

1. corezi: doin