Ciaravalle 1833/Prefazion
Prefazion
Son chì, Amixi, de ritorno
Doppo dexe meixi, e un giorno
C'hò viaggiôu pe andâ in ta Lun-na
A çercâ un pö de fortun-na;
Ma son stæto sfortunnôu,
Do gran freiddo hò remondôu;
Eo zà lì vixin ao Porto
Ma hò dovûo tornâ in derrê
Per n'avei de passaporto,
Traversâ de nêuvo o Çê,
E vegnî zù a rompicollo,
Tale quale me veddeì,
Co-a provvista che porteì;
Ah che pe-i spurj d'Appollo
No se pêu trovâ fortun-na
Nè chi ao Mondo, nè in ta Lun-na;
Desdicciæ son troppo i Poeti
E co-i Ommi, e co-i Pianeti!
Ciù un pittin resto strinôu
Dä Cometa che hò intoppôu,
Con grandiscima perucca,
E mustasci ä mammalucca,
Ma g'hò dæto un gran spuncion
Verso e parti do Giappon,
Coscì a Zena a n'è vegnûa;
Hò posciûo in quest'occaxion
Osservâ con precisûa
Di Pianeti a poxision,
E l'influenza che han frà lô
Tutte e Stelle, a Lun-na e o Sô,
Per predî pe-o Trentetreì
Tutto quello che lezzieì
Ne-o mæ quarto Ciaravalle,
Cioè Fabbricatô de Balle;
Serrò o pægua, e m'imbrassallo
Batto... attenti... zêugo?... fallo!
Et in primis, v'assegûo
Che s’aviä un Inverno crûo,
Poca neive, giasso assæ,
E gregàli indemoniæ;
Provveddeive tutti ben
De pelisse, e baracchen
Dunque reddeni restieì;
Sä propizio verso a fin
O Sciô Acquario ai vendivin,
Poco sccietto ne bevvieì.
Capitiä un pô ciù tardïa
A Sciâ Primmaveja sciuïa,
Con l'assazzo de merelli,
De gren sexe camuggin-ne,
Articiocche tutte spin-ne,
Bazanette, e puisci belli;
Gran passaggio de strunelli,
Gallinette senza suffo,
Pesci abbrettio è funzi a uffo.
Se no sbaglio in te l'agnostico
Un-na bella Stæ pronostico,
Ma un pö cäda, anzi buggìa,
Sezia in grande, carestìa
Uga bella, e fighe bon-ne,
Abbondanza de sioulon-ne,
D'êujo, e pan mediocritæ,
Gran cäçin-na pe-i despeæ.
Un'Autunno aviemo poi,
Pin de sucche secche, e coi,
De castagne poca annâ,
De gren nespoe da mondâ
Chiniä e pigne, e cresciä l'aggio,
Lebecciadde, gran passaggio
De ballaæn-ne, e de frenguelli,
Ghe sä ciù Caccioeì che oxelli,
Gran consutnmo de stuffôu,
Ecco l'anno terminôu.
Poi parlando in generale
(Se no sbaglia o Canocciale)
O dev'ëse un'anno bon
De treì Meixi per Stagion;
Hà da vive, chi no mêue,
In perfetta sanitæ,
Ammuggiä de parpaggiêue
Chi no spende de dinæ,
E stä sempre in allegria
Chi n'aviä malinconia
Coscì ho visto scrito, e dove?
Sotto a barba a Barba Giove.
Ne-o decorso poi dell'anno
Ecco cose hà da seguî
Salvo o veo, e se no m'inganno
Voendo leze l'avvegnî.
Doppo un'Aurora Boreale
Succediä un gran Temporale,
Ma no sò de che Stagion,
Se vixin oppù lontan;
Se a Levante, o a Settentrion,
I Mainæ poi ne o contian.
S'hà da arvî un nêuvo Vulcan
Chi cacciä ciù prie che fêugo,
Ma no ve sò dî in che lêugo,
Se a Levante, se a Ponente,
Se in to nostro Continente,
Se vixin, oppù lontan,
Ma e Gazzette ne parlian;
Vegniä un grande Terremoto
Chi sprofondiä un-na Çittæ
Quante Genti, e Bestie in moto!
Quanti morti!.... no tremmæ
Che e mæ prêuve dixan tutte
Che o vegniä là in Calicutte;
Sûccediä un'Inondazion
Doppo un gran diluvio d'ægua,
Che restiä negôu sott" ægua
Cose?.. un schêuggio ao Golfo Lion;
Ma parlemmo d'allegria;
Un-na grande Epidemia
Contaggiosa hà da regnâ,
Se a vorriàn tutti afferrâ
Tanto o zuveno, che o vegio,
Ma de cose? ... de mangiâ
Ben assæ, e de beive megio.
Succediä un-na gran battaggia
Senza balle, nè metraggia
Senza scciêuppi, nè canoin,
Senza puvee, e munizioin
Che vegniä fin rosso o mâ
Dove?... sorve Portofin,
Frà duî Tonni e un Pescio-Spâ.
Marte, e Venere accostæ
In ta casa de Mercurio
No son guæi de bon augurio,
Gran facende fä i Uspiæ;
Gh'è Saturno poi chi vêu
Divorâ di gren figgiêu,
O spediä vinti buttiggie
De vujêue per mascci, e figgie,
Dexe fiaschi de rosazze,
E quattr'amoe de götazze.
No ve parlo de politica
Perchè a l'è cosa impolitica,
Poi per veddighe gh'è scûo
Solamente m'è parsciûo
Scandaggiando ben a Lun-na
Che s'ecclisse a Meza-Lun-na;
Quello che ve diö segûo
Che ciù guere no sentiemo,
Da per tutto paxe aviemo,
Travaggiä o Commercio in grande,
Mercanzie da tutte e bande,
Affaroin, speculasioin
Pe-i asperti, e pe-i mincioin
Da guagnâ senza fatiga;
Ma nisciun cante vittoja
Senza tiâ l'ultima riga.
E chi termino l'istoja,
Stæme allegri che hò premua,
Addio...... vaddo in rebattûa.
.jpg)