Ciaravalle 1833/L'equivoco

by Martin Piaggio

←L'ôa de Disnâ

Ciaravalle zeneize pe l'anno 1833 de Martin Piaggio L'equivoco

Sunetto→

L'equivoco

Un Villan portò un giorno a regallâ
Un-na panêa de fighe a so Patron;
Intrôu in sala se ghe vî a accostâ
Due Scimie, che e ciù belle ghe mangiòn;
Lê che de Scimie mai visto o l’aveiva
O e piggiò per de casa, e o se ne rieiva.

O portò o resto in stanza do Padron,
Chi aveiva visto a scena dä portêa,
E per cose (o ghe disse). Batteston
Ti hæ portôu meza vêua quella panêa?..
A l'ëa pin-na (o rispose) in mæ veitæ!
Ma e sò Scignore figgie e an mangiæ.