Chittarin zeneize 1881/31

by Martin Piaggio

←Pastiçetto

Chittarin zeneize de Martin Piaggio Scherço

Scherço→

Versci d'acompagnamento a 'na fetta pandoçe e 'n piato de raiœu a-o so compâ Loigi Marcheize do 25 dex. 1811.

SCHERSO ¹

---

Ve spediscio per Santinn-a ²
De pan dôçe ûnn-a fettinn-a,
Che Paolinn-a co-a Giggetta ³
Dixan zà: Che grossa fetta!...
G’hälo a speiza, o che Bûsmin! ⁴
Oh guardæ che Pöchettin!...
Gh’é l’assazzo pe-i figgiêu.

Poi ve manda mæ moggê
Ûn piattetto de raviêu,
Ch’a i ha fæti tûtti lê,
E a g’ha perso quæxi a nêutte
Fra a fattûa e i erbe chêutte,
E o destendili a ûn per votta,
Ben ammiæ de sorva e sotta,
Ché no seggian desbëlæ...

Dï ûn pö ä vostra Têxinin ⁵
Ch’a i assazze, ché son boin,
C’ûn bon tôcco^[sic] e informaggiæ,
Perché ho fæto o rosto apposta,
E che stûdio ch’o me costa!...

Perdonæme, compâ Giggio,
A licensa che me piggio
De mandâve questa mostra:
E fra tanto vêuggio dâ
A voî e a tûtta a casa vostra
Bonn-e Feste, bon Dënâ,
Bonn-a fin de l’anno vegio,
Chi va presto a terminâ,
Bon prinçipio e fin ciù megio
Do nêuv’anno chi spuntiä,
E che allegri o se passiä
In perfetta sanitæ,
Con di guägni e scagge⁶ assæ,
Che Dio vêuggie, e coscì scia!
Riverïme a compagnia,
Ve son servo

Martin Bæ.