Chittarin zeneize 1881/271 Sunetto

by Martin Piaggio

←Ciaciarata

Chittarin zeneize de Martin Piaggio Sunetto

Capriçio→

atro brindixi lezuo da l'aotô a-a fin do pranço do "strofoggio" precedente

SUNETTO ¹

Sitto! che doppo sto furioso attacco
E distrûzion de piatti a massabecco,
Doppo aveì dæto a denti sciûti o sacco,
Fæto restâ e bottigge e i gotti a secco;

Con sta scuaggia de vin me bagno o becco,
Per fâ ûn grandioso brindixi, per bacco!
Doppo a battaggia, a chi manezza o stecco,
A chi ciarla, a chi fûmma e dà tabacco.

Evviva! sbraggio forte, per fâ spicco,
E gallezzando comme ûn mamalûcco,
Quanti chì semmo, o gotto tocco e ciocco.

Vadde a malinconia per sempre a picco:
O primmo chi cianziä reste ûn alocco,
E chi no rïe de chêu divente eunûcco.
     Aoa che sciorte Lûcco

Per fâ ûn sûnetto sorve o sò buricco,
L'ätro o fasse Manfredi cö lambicco
     De chi me ne busticco ²

Per lëze a tradûzion da-o piemonteize
Do congresso a Turin, fæta in zeneize.³