Chittarin zeneize 1881/127 Supprica

by Martin Piaggio

← Sghiribiçço

Chittarin zeneize de Martin Piaggio Supprica - a-o marcheize Giancarlo De Neigri

Scherço→

SÛPPLICA ¹

Sciô marcheise Gian Carlin,
Ghe spedisce sto libretto,
Con fidûcia e con rispetto,
O guardian di Capûççin:

Doppo letto in t’ûn momento,
Co-a sò solita bontæ,
Scià veddiä che l'argomento
O finisce con... dinæ!

Ma dinæ che non andiän
In cuxinn-a e se spendiän
Pe fä ûn bello e straordinäio
Solenniscimo ottaväio
A onô e gloria da divinn-a
Gran Veronica Giuliani,
Nêuva santa Cappûççinn-a,
Nêuvo lûstro a-i Franciscani.

Sciô De Negri stimatiscimo,
Fa chi pêu, e no fa chi vêu,
E vosciâ religiosiscimo,
Conosciûo pe-o sò bon chêu,
Da per tûtto decantôu
Pe ûn gran poeta e rinomôu
Per a sacra sò dottrinn-a,
Scià no dä ûn pittin d’aggiûtto
A ûnn-a Santa sò vexinn-a?...

Scignor scì!... speremmo tûtto
Da l'innata sò pietæ
E da quella ben paleise
Grande generositæ
Da patrizio vëo zeneise
Ne-a quæ conta, e se gh’inchinn-a

A famiggia Cappûççinn-a
Con o sò bon servitô
Paddre Luigi, che ha l'önô
De lasciâghe co-a poexïa
O pasteco.....² Scignoria!