Chittara/dedicatoia

Chittara zeneize Dedicatoia de Martin Piaggio, l’Editô

pe-o maiezzo Spinnoa=De Neigri, Zena, Pagan, 1823

A l'è cosa de modda, e da tutti adottâ
De susurrâ o Parnazo, e Muze invexendâ,
Quando succedan Nozze, e con ciù son distinte
Se vêu dî de gren cose, ma no se dixe ninte,
Ciêuve da tutti, i canti di mûggi de Poexïe
In lode di Spozoei, che son pè o ciù boxïe,
Cansoin epitalamiche, Sunetti, Matricali,
Idee frite, e refrite, passæ pè originali;
Veneri, Ganimedi, Amô chi vedde ao scûo
A Nice, e tresse d'öu, a pelle de Velûo,
Denti d'avorio, i labri ciù rossi che o Carmin,
Masche de rêuza, e o collo de neive co-i... brassin,
Êuggi che bêuttan freccie, e tant'atre incredibili
Arcadiche miseje, che son vegnûe insoffribili
A chi ha un pö de bon senso, e dai bravi Scrittôi
Schivæ ciù che e pistolle, ne trêuvan ciù Lettôi.

Un nobile Imeneo Zena fa vedde anchêu
Fra dui figgi amatissimi, di sò ciù cai figgiêu,
Spin-nola con Deneigri son troppo rinommæ
Ne o mondo letterario, e in patria decantæ

Per ommi de bon gusto, e de belle arti amanti,
Do genio, e di talenti Mecenati zelanti;
L’un favorîo da-e Muze, e poetico Oratô, ^[1]
D’Istoja naturale l’atro grande Amatô ^[2].
I tipi da Liguria nò son ancon sciûghæ
Da-e belle produsioin, che i han tanto onorae.
Chi ha sangue, e cêu^[sic] zeneize no pêu non giubbilâ
De vedde quest’alleanza, e a deve festezzâ.

Ultimo mi pe-o primmo, e rispettosamente
M’uniscio (se m’è lecito) in mezo a tanta gente
Per tributâ ai Spozoéi in segno d’allegria
I mæ rallegramenti, non zà con mæ Poexia,

Ma con fighe l’offerta d’un’opea ristampâ
D’Autô Zeneize classico, e ræa, quanto çercâ,
Questa do gran Cavalli a l’è a Chittâra ^[sic!], e questa
Ghe dedico, e gh’umilio per celebrâ a gran festa
Di nostri illustri, amabili, e zuveni Spozoéi,
I quæ nemixi acerrimi per genio, e per dovei
Do fasto, da sûperbia, e d’ogni adulasion
Gradian corteizi a Dedicâ d’un libbro utile, e bon
Ciù che tanta faraggine de poetiche freidûe
Che mêuan primma de nasce, o appen-na son nasciûe.

Lezendo questo libbro trovian gusto, e diletto
Perchè scrito da un Genio, che ne-o patrio dialetto
O n’ha ancon chi l’eguaglie, o chi o posse immitâ;
E o Pindaro Zeneize o se pêu ben ciammâ;
Vario argomento, e stile, grave, sacro, amoroso,
Ne o serio sorprendente, ne o lepido grazioso,
In tutti o l’è o Cavalli, o solo nomme o basta
Per fâghe i primmi elogj che nisciun ghe contrasta;
Se Agostinetto, e Laura gradian questo lavô
Feliçe, e sodisfæto se ciammiâ l’Editô.

---

1. L’Illustrissimo sig. Marchese G. C. Di Negro Padre della Sposa ha già pubblicato varie eleganti poesie di vario argomento, ed attualmente sta per dare alla luce con tipografico lusso una bellissima raccolta di Sermoni Sacri.
2. L’Illustrissimo sig. Marchese Massimiliano Spinola Padre dello Sposo è noto abbastanza per i suoi lavori sulla Storia naturale, e specialmente sull’Insettologia e sull’Inctiologia. Ved. Faunæ Ligustica fragmenta Genuæ 1805. Memoria dell’Accademia delle Scienze, Lettere, ed Arti di Genova 1814. Novae aut rariores species Insectorum Liguriæ, etc.