Cava in to remoin 1930/ZENÂ

In to remoin de Gioxeppe Cava
Zenâ

Zenâ incominsa l'anno e veramente
di prinçipianti o l'ha tûtti i difetti;
de votte o filla ben, ma de sovente
o ne regalla i gianchi sêu sciorbetti.

I vègi tegnan conto de calende
pe giûdicâ se bunn-a a sià l'annata;
se neiva ö giorno sètte, ben s'intende
che a lûggio o ghe saiä na nevicata.

A sciensa de calende a no fà falli,
e se ghe fae attenzion, lettui corteixi,
ben mëgio poeî saveî che no da-i calli,
ö tempo che faiä 'sti dozze meixi.

Cattaeve ancon ö Doppio Pescatore
e ammiae de ben sciorbive e previxioin,
ridile, poi, con posa da dottore
e i re ve proclamian di Benardoin.