Cava in to remoin 1930/ILLÛXIÔN

In to remoin de Gioxeppe Cava
Illûxion

[p. 40 modifica]ILLÛXIÔN

    Son solo e in ti arregordi da mae mente
ti vivi co-e têu grazie biricchinn-e;
son solo solo, eppûre ti ë presente
e strenzo fra e mae man e têu maninn-e.

    Zûghemmo ancon insemme e conto e votte
che e man te fasso batte parma a parma,
e zûgando coscì me scordo e lotte
da vitta desgraziâ e trêuvo a carma.

    Tî gûsto ti ghe piggi e in cantilena
ti canti insemme a mî tûtta contenta,
e a têu vöxetta acûta a rasserena
'sto chêu ferio da-o dô ch'o me tormenta.

    Passa ö tempo? No sò, no n'ho ciû ö senso
ne l'illûxion che adaxo a me trasporta
in to passôu feliçe, e ciû no penso
che mi son solo e tî, mae ben, ti ë morta!