Cava in to remoin 1930/Ö PRAEVE ZEMBO
| ←Ö cantante sfiatôu | In to remoin de Ö praeve zembo |
A scoverta de Voronoff→ |
Ö PRAEVE ZEMBO
Sciâ scûse, reverendo, ma no posso
ëse d'accordo in scimile argomento:
saiö, cömme sciâ dixe, ûn ortodosso,
ma logico no trêuvo quanto sento.
No gh'é 'n'â faccia paegia in mezo a çento
chi ha ö naso rebeccûo e chí l'ha grosso,
chí é bello da baxâ, chi fa spavento,
chí é magro cömme ûn picco e chi ûn colosso.
Pe ëse faeti a immagine de Dïo
a differenza a l'é troppo evidente;
perciò mî, reverendo, a 'sto regïo
de frasi no ghe creddo ûn aççidente...
E poi, sciâ me permette, o fiö avvertïo:
con quello zembo lì, no l'é prûdente!...