Bolle de savon/Punto e a cappo

Da Wikivivàgna
Sata a-a navegassion Sata a-a serchia
Bolle de savon de Carlo Malinverni
Punto e a cappo
[p. 75 modifica]
Punto e a cappo

Punto e a cappo; incomensemmo
torna l'ätro fêuggio a scrive:
scin che a penna in man ghe l'emmo,
ben o mâ, cäi mae, se vive:
se n'é visto d'ogni menn-a,
se n'é avûo de tutte e chêutte....
segge, amixi, pronta a çenn-a
a-o sûnnâ da mëzanêutte:
a-e bottiggie sâte o tappo,
e bevemmo:… punto e a cappo.

Contâ cöse l'é successo?...
ghe vorriae o Successo intrego:
no me-a sento, ve-o confesso,
de doggiâme a questo impiego.
Diggo solo: doppo a saeta,
doppo o lampo, dopo o tron,
pe i tedeschi a gran desfaeta,
pe l'Italia o tempo bon.
chì a bottiggia! - säte o tappo
e bevemmo:.... punto e a cappo.

[p. 76 modifica]

Pe-o nêuv'anno, mi n'intendo
imbottive de luçïe:
nì n'accatto, nì ne vendo,
pe no rïe, pe no fâ rïe...
Ghe sä scin che o mondo é mondo
i mä visti da-e palanche;
chi gallezza e chi và a-o fondo,
pëgoe neigre e pëgoe gianche....
chì a bottiggia! säte o tappo,
e bevemmo:.... punto e a cappo.

Punto e a cappo; e a poco a poco,
quaccia quaccia, arriva l'öa:
ne tocchiâ giâ l'êuggio a sciöco,
e piggiâlo sotto ä cöa:
doppo tanto sciato e tanto
credde d'ëse chi sa cöse,
patatrac! ne daemo ûn cianto,
ne sûnnian i eredi e pöse....
Ciù n'aviemo e moen in pasta,
faemo punto; - punto e... basta,