Berio m.r. II 1.6/De li vicij et de le virtue/1
La gracia de messer Yhesu Christe e le soe virtue si son via e scalla de andar in vita eterna. Ma li vicij e li peccai si son via e scalla de andar allo profundo de lo inferno. Ancora li vicij e li peccai si son tösego mortale. Ma le vertue e le bone opere si è triacha medicinale. L'una gracia si comduxe e tira a si l'altra et cossì l'uno vicio si tira l'altro. La gracia non desidera de esser laudata e cossì lo vicio non pö sofferir che sia desprexiao. La mente devota de lo homo in la humilitae e paciencia se demostra et la santa puritae de lo cuore Dio si lla vede, ma la vera devocion elo gusta. Onde se tu ami serai amao e se tu temi serai temuo. Se tu servi serai servio. Se tu bene te porterai cum altri, conven che altri se porten ben de ti. Onde beato è quello chi veramenti ama e non dexidera de esser amao. Beato è quello lo quar serve e non dexira de esser servio. Et imperzò che queste cose son altissime virtue e de grande perfecion e inperò li stulti non la pon aquistare. Onde tre cosse son molto altissime e utilissime le i quai chi le avesse aquistae non poreiva i mai cazer.
La prima si è se tu sostegni vorentera e cum allegreza ogni tribulacione chi te vegna per lo amor de Christe.
La segonda si è se tu te humilij ogni giorno piu in ogni cossa che tu fai.
La terza si è se tu fidelmenti ami cum tuto lo tuo cuore quello sommo bene celestial invisibile, zoè Dio e lo qual non se puo veder cum li ochij corporai. Quelle cosse chi son piu desprexiai e piu vituperai da li homi mondani certamenti e son piu aceptai e piu honorai da Dio e da li suoi santi. Et quelle cosse chi son piu amai e piu honorai e piu piaxeno alli homini mondani et si son piu desprexai e piu vituperai da Dio e da li soi santi. Et queste laude procede de la ignorancia e de la malicia humana, imperzò che lo homo misero piu ama quelle cosse le quai devereiva avere in hodio.
Demandà una fiata frai Gilio a uno frai dicendo: Dime carissimo ai tu bona anima? E quelo frai respoxe: Padre mio questa cossa e non non la so. E lantora disse frai Gillio: Fraello mio e vögio che tu sapi che la santa contricion e la santa humilitae de l'omo e la santa caritae e la santa devocion e la leticia santa si son caxon de far l'anima de lo homo beata.