Allegria per san Martin

by Martin Piaggio

Allegria per san Martin Cansonetta de Martin Piaggio

Zena, Stampæja Pagan 1832 ca. Exemprâ conservao inta Libraja Naçionâ de França, da-a coleçion do Paul Ristelhuber .

ALLEGRIA

PER SAN MARTIN

Cansonetta

Cattainetta allegramente
No stæ a stâ cö coêu piccin,
Che doman l'é San Martin,
No ghe stæ un po ciù a pensâ
Che a Burasca a l'é passâ;

2
Doppo tanti spaventaggi
Che i Astronomi m’han misso
Per fa andâ o Mondo in subisso
A Cometa a no s’e vista
E lô solo han perso a vista;

3
Ringraziemmone o Creatô;
Se gh’é o Cholera chi gïa
Cattainin n’aggiemmo puïa
Che a Madonna a n’avvardiä
E chi a Zena o no gh’intriä;

4
Se gh’é a Guëra a l’è lontan-na
Ma ben presto, se a Dio piaxe,
Restiä tutto o Mondo in paxe
E porriemo Cattainin
Fâ ciù allegri i San Martin;

5
Stemmo dunque allegramente,
No sospiæ un pö ciù Comâ
Che a Burasca a l'é passâ,
Pensæ incangio Cattainin
Che doman l’é San Martin.

6
Preparæ, a pagâme a festa,
E pe arrecuveâme o coêu,
Un bon piatto de Raviêu,
Quattro Triffoli, un Cappon
Sopratutto do Vin bon;

7
Se ghe fusse poi per caxo
O Pescietto, a Beccassin-na,
O Bescêutto^[sic] da Regin-na,
Caffè, e Vin particolâ
No ghe saiva nisciun mâ.

8
Ve prevegno d’un-na cosa
No ve stæ a scordâ e rostïe
Ma maronne, e brustolïe
Da toccâsele in to vin
Per fâ megio San Martin;

9
Cose voeì mai fâ do motto?
No veddeì che o tempo passa,
Se voeì conservâve grassa
Rossa, fresca e regagïa
Ai dinæ no se gh’ammïa;

10
Presto dunque destrighæve,
Andæ in Ciappa a fâ provvista
Voemmo fâsene un-na pista,
E stâ allegri Cattainin
Che doman l’é San Martin;

11
De raxon v’ho dæto i Morti
Co-i Baccilli, e co-i Balletti,
E un pappê de Fenuggietti,
No vorriæ vedde ancon questa
Che no me pàgasci^[sic] a Fæsta;

12
Scialla! scialla! fæ bocchin?
Ho capïo, Comâ nissêue!
Ho toccôu dove ve dêue,
Brava! evviva Cattainin!
Fæmo insemme San Martin;

13
E poi subito disnæ
Se n’andiemo (se porriemo)
In Bezagno, e là veddiemo
Passâ a uffo, gioja bella,
Do gran Vin senza gabella;

14
Se troviemo qualche imbriægo
Che per caxo o ne spunciasse
O l’é incontro de Cazasse,
Calamitta, scimpatia
E attrazion do Vin che gia;

15
Stemmo dunque allegramente,
Comâ caa no ghe pensæ,
Van e vegnan i dinæ,
E pe i grendi, e pe i piccin
Ven per tutti o San Martin;

16
Giorno bello fæto apposta
Per levâ a muffa da-o coêu
Per pittâ di gren Raviêu,
E trincâ do bello Vin,
Viva sempre San Martin;

17
Cattainin se semmo inteixi
Miæ de fâ e cose Comâ
Da intrâ in grazia do Compâ
Che mi poi perdingolin-na!
Ve fö fâ Santa Martin-na;
Viva sempre San Martin,
E chi beive do bon Vin!

M. P.

---

ZENA, STAMPÆJA PAGAN
Con permiscion.