A scœua e a virtù 1870

by Giullio Roman

A scœua e a virtù de Giullio Roman

Zena, Stampaja Sociale, 1870
exemprâ conservao inta Libraja Naçionâ Centrâ de Firençe

Sento o Præve dall’artà
Tanto a seïa che a mattin
Spesso spesso predicâ;
Sento u pöè che spesso u sbraggia
Salùtandome canaggia
Potrunasso e biricchin;
Ma da-o tempo de ciæbelle
Quando pà che u çè co-e stelle
Chin-na a tærra u se ne rïe,
Dopo dîte e litanïe
U pöè o fresco o va a piggiâ
E a derêe ghe veuggio andâ
Tante cose a-e bonn-e alloa
O me dixe e o m’innamöa.
Me ricordo che unn-a seïa
De San Luigi l’ea pe-a veïa,
Guarda figgio, u m’ha insegnoù
O peccoù che è confessoù
O l’è mezo perdunnoù.
Mi son chi per confessâme
S’aviei testa de sentî,
Poi se mai vorriei sbraggiâme
Fêlu pû, ma compatî.
Có mê esempio ve fô vedde,

Ve fô ascì toccâ con man
Pe impegnâ ciù a Commiscion
Che se a-e Schœe tanto a provvedde,
A no straggia tempo e pan,
E che a mette emulazion,
Che a l’insegna a fâ do bon.
Sotto un erbo de campagna
In sce l’erba da campagna,
Spigolava un giorno sexe
Che m’aveiva destaccoù
Da un erboetto sorva a strä
Con tant’ongia ben affiä.
Treuvo intanto dûi gardetti
Tutti intenti pe zûgâ,
Mesciâ primma con due möen
Ben scrollando di dinæ
Un de lö con äta voxe
Sbraggia intanio griffo, cröxe,
Tutti i citti son buttæ
E poi guardan cose ven.
Serto l’ea quella mattin
Quexi tre öe ch’ea in cammin
E frattanto ch’ea defeua
No pensava mai a schœua,
I figgieu che allöa zûgavan
Lascian tutto e sappan via
Comme a dî un t’ùn batti d’œggio
Ogni cosa a l’è finîa.
Sun restoù comme o sciö Gæa,
Comme ùn porpo sotto ùn schœggio
Ma n’ho visto ciù mainëa
A disgrazia de schivâ

Che me sento minacciâ
Do mé païze g’hëa u Pastù,
E o se mette a interrogâ
M’arso, e a faccia de russû
Tutta tinzise me pâ,
U me dixe cose fasso,
Mangiu sexe e i œuggi abbasso
Sun e tö? O scignor scì.
I figgieu c’ho visto chî
Cöse favan? Mi nu sô.
Ti ë cattivo? Päi de no.
Ti ghè stæto a schœua? Pe ancheu
Che ghe vadde o pöè o no veu,
O m’ha dito che a cättâ
Vadde pan, tabacco e sâ.
Quello præve mi ho pensou
Che o l’avesse fæto a strïa,
O m’ha tutto indovinou:
Che g'ho dito unn-a boxïa,
Quelle sexe no ëan e mê,
I figgieu fàvan scrollin,
Perchè andasse a schœua ciù presto
O m’aveiva crioù më pöè
Quella mêxima mattin.
Ma l’è stëto pezu o resto,
Che o m’ha dito tutto questo:
A chi solo a so raxon
Perchè a schœua a l’è in abbandun
Vanni a schœua, mïa d’imparà
Ti viviæ senza sbagliâ.
Se a to meistra ti dæ mente
A dottrin-na t’impariæ,

Lese e scrive ti saviæ,
E boxïe non ti ne diæ;
Lascia ai âtri o fæto so
Guarda a lezze da Segnö;
Schiva o vizio, e quanti centi
Ti avanziæ pe-i to parenti
E per ti quanti lamenti
Mïa che l’ozio o l'è cattivo
Le za morto benchè vivo
Ogni ozioso gardettin
O l'è vegio ancon piccin.
Vive ben chi sa lauâ;
E chi pensa d’imparà;
Mïa, che sempre tanto pöemmo
Quanto solo nòî imparemmo;
Fêmmo spesso du gran mâ
Perchè o ben nö semmo fâ
Queste cose che aöa mi
Te son stæto a discorì
Dille a-i ätri, e conosciei
Tùtti au mondo se scampiei,
Che v’ho dito figgieû mæ
A ogni paöla un-a veitæ.
O Scignöî da Commiscion
Ho prövoù che o l’ha raxon.
N’ho lascioù mai ciû unn-a schœua
Tanto in casa che defœua,
N’ho ciû dîto de boxïe
Manco quelle da fâ rïe,
Robba d’atri mi non n’ho
E me sento megïo un pô
A më Meistra obbedïente,

A më pöè gho dæto mente,
Guerra asseiza all’ozio ho zûoù
E nisciun me g’ha sforzoù;
Ho capïo coscì contento
Da-o mê Præve in t’un momento
Che l’ean stæte pronunziæ
A ogni paöla de veitæ.
Dæme o premio, e parlo sccetto,
Guardîô d’êse ciù perfetto,
Sempre amïò de fáme onö
Tanto in Schœua che cö Segnö,