Çittara zeneize/Rimme villareççe/Solo, dezerto, e pin de pensamento
| ←De villa in villa Amô, de valle in valle | Çittara zeneize - Rimme vilæçe de Solo, dezerto, e pin de pensamento |
Trappa no invisco moǽ per oxellâ→ |
| Zena, Franchello, 1745 notte do Prien |
V.
Solo, dezerto, e pin de pensamento,
Con ro cœu tutto cœutto e preboggío,
Vaggo pe ro deserto, e no me fio
D'âtro compagno che dro mæ lamento.
Póso ro pê pin d’asmo e de spavento,
D’ogni minima fœuggia ingiroxío.
Guardo, se Amô m'ha visto nì sentío,
Per fâme quarche nœuvo tradimento.
Ma quanto ciù m’ascondo e me sotterro,
Lê, chi m’ha pe ra brilla, e me ten forte,
Sempre è comeigo, e pâ ch'o sæ de ferro.
Fuzzo, aborriscio Amô comme ra morte:
Ma se ciù me destacco, ciù m’afferro.
Tanto porta con seigo ra mæ sorte!