Çittara zeneize/Rimme villareççe/Con ghirlanda de rœuze e giasemin
| ←Cari boschi, ombre care e retirǽ | Çittara zeneize - Rimme vilæçe de Con ghirlanda de rœuze e giasemin |
De buschi in buschi Amô, de sêze in sêze→ |
| Zena, Franchello, 1745 notte do Prien |
II.
Con ghirlanda de rœuze e giasemin,
E ro sen tutto pin de viorette,
Zà l’Arba s’appointava re scarpette,
Per uscî fœura e mettese a camin.
Quando per dâme a mi ro mæ latin,
E sciaccâ un poco a l’Arba re sciorette,
A fronte sò Lichinna Amô fè mette,
Per vei, quâ bello avǽ ciù dro divin.
Oh che bello mirâ, da man de læte,
Da pê de neive lì pe re campagne
L’erba nœuva e re scioî tutte refæte!
Se ben no così in tutto eran compagne;
Che uña reffâva scioî ch’eran zà fæte,
L'atra re fâva lì con re carcagne.