Çittara zeneize/Rimme çivî/Mæ cœu, ben veggo che ro stâve a fâ
| ←Se ra vitta, che façço e che hò da fâ | Çittara zeneize - Rimme çivî de Mæ cœu, ben veggo che ro stâve a fâ |
Quando ro Sô comença a tramontâ→ |
| Zena, Franchello, 1745 notte do Prien |
XV.
MÆ cœu, ben veggo che ro stâve a fâ
Ra tintinolla aprœuo, ro cianzorin,
L’è tutto tempo perso, e in sciù ra fin
Che ro tutto in un ninte ha da sparâ:
Che voî sei bella vòtta ond’hei d’andâ,
Faççe pù quanto sò ro pigoggin:
Che, se ve fesse mille pellegrin,
A ri pê sciù ra fin v’hò da croâ.
Ma che posso ciù fâ? Zà sento a l’osso
Zœumoæ ra freve in viçio deçernuo:
Zà voî m’avei troppo possesso adosso.
Averò fæto quello che hò posciuo:
Sarò scuzao: dirò, se ciù no posso:
Paçiençia! Minetta n’ha vosciuo!