45.
Gii’ëa in personn-a o Bey d'Oran
Con o Bey de Costantinn-a,
Ch’ëan vegnûi c’ûn gran takan
Per voeì fâ tanta tonninn-a
Di Cristien, ma scappòn via,
Arrancandose a sciscïa;
46.
Infinito fù o Bottin
Che se fè: Cammeli, Bæ,
Tende, e immense provvixioîn
Unn-a cascia de dinæ,
Finn-a de marmitte pinn-e
De bon riso, e de gallinn-e.
47.
Andò a nêuva in t’ûn momento
De sta gran desfæta a Argê;
A ghe fè tanto spavento
Che scappavan pe-i quartê;
O Divan no vêu ciù guæra,
Ma ghe schitta a testa in tæra.
48.
Non fâ Hussein tanto o testardo
Che sbarcâ a grossa artiggiaja
Ti perdiæ o megio baluardo;
Serve assæ a to cavallaja!
I Françeixi te l’ammïan,
Van avanti, e se ne rïan.
49.
Doppo quello bello fæto
L’armâ andava sempre avanti
Con giûdizio, nè gh’è stæto
Atre cose rilevanti,
Se non che d’ogni pittin
Scaramnccie co-i Beduin.
Pagina:Piaggio Poexie zeneize 1846.djvu/237
![](http://upload.wikimedia.org/wikipedia/commons/thumb/c/ca/Piaggio_Poexie_zeneize_1846.djvu/page237-1024px-Piaggio_Poexie_zeneize_1846.djvu.jpg)