 |
Questa pagina a no l'è stæta corretta. | |
ILLÛXIÔN
Son solo e in ti arregordi da mae mente
ti vivi co-e têu grazie biricchinn-e;
son solo solo, eppûre ti ë presente
e strenzo fra e mae man e têu maninn-e.
Zûghemmo ancon insemme e conto e votte
che e man te fasso batte parma a parma,
e zûgando coscì me scordo e lotte
da vitta desgraziâ e trêuvo a carma.
Tî gûsto ti ghe piggi e in cantilena
ti canti insemme a mî tûtta contenta,
e a têu vöxetta acûta a rasserena
'sto chêu ferio da-o dô ch'o me tormenta.
Passa ö tempo? No sò, no n'ho ciû ö senso
ne l'illûxion che adaxo a me trasporta
in to passôu feliçe, e ciû no penso
che mi son solo e tî, mae ben, ti ë morta!
Ö LIBBRO DA SÊU PRIMMA COMENION
O m'é vegnûo pe-e man veiseia tardi,
ö libbro da sêu Primma Comenion,
ancon fasciôu da lë con i riguardi
e a fede de l'ingenua divözion.
