Poexie zeneixi do Feliçe Santi/E pövie passoete abbandonæ
| ←Fêugge secche | Poexie zeneixi de E pövie passoete abbandonæ |
O magnæra→ |
Perché, perché ti te n’ë andæta via,
Lasciandone chi sole e desolæ?...
Perché manco ûn addio e t’ë sparîa,
Senza fâne saveì dôve ti væ?...
Pûre, de nomme e fæti, t’ë ûnn-a Pia;
T’ë ûn’angiôu d’o Segnô pin de caitæ,
E o nöstro chêu o te cianze, o te sospîa,
Comme ti fîsci pröprio nöstra moæ!...
Se si savesci o dô ch’èmmo provôu,
Quande arrivando là da-o tö barcon,
L’èmmo attrovôu desærto e sigillôu!...
Ah!... Ti savesci a-o chêu che gran patton!...
Emmo piccôu in ti veddri; èmmo ciammôu,
Cento, pregôu che ti n’arvisci ancon...
Scin che, in sciâ ciappa do barcon serrôu,
Semmo cheite, desfæte dä pascion!....
Comme mai, comme mai poêmo scordâte,
Ti, che ti n’æ allevôu e ti n’æ nûtrîo,
Ti che ti n’æ accûgeito appenn-a nate,
Ti, che t’ë nöstra moæ davanti a Dio?...
Vorriescimo saveì dôve attrovate,
e vegnîte a ciccioâ tûtto d’ingîo:
A piccate in ti veddri e a ricordate
E pövie tö passoete senza nîo!...