Lûnäio zeneize 1932/Zena vegia
| ←Zena comme a l'ea e comme a l'è! | Lûnäio zeneize pe l'Anno bisesto 1932 de Zena vegia |
Zena nœuva→ |
.jpg)
ZENA IN TE L'ŒTTOÇENTO
ZENA VËGIA
Veddo Zena, comme a l'ëa
ciù de sciûsciant'anni fà,
co-a stazion da rebellëa
in sce a ciassa da Nunziâ.
Da Lanterna han derûôu e porte,
San Teodôu l'han cacciôu zù
co-o Gigante, e pe 'sta sorte,
San Tomaxo o no gh'è ciù.
Zena mæ, antiga e bella
mi t'ho sempre in to chœu
per mi ti ê sempre quella
che ho visto da figgiœu!
I portoin de l'Accassœua
che aïva fæto o Barabin.
con Via Giulia han fæto fœua,
ha avûo l'Aerco a stessa fin,
Borgosacco e Sant'Andrîa,
Manicomio e Cavalletto,
Porta Pilla, e compagnia,
son ridûte in tanto zetto,
Zena mæ antiga e bella ecc.
E chinette do Bezagno,
o tîo a segno, a Cappelletta —
che a l'ëa sempre stæta a bagno
— son sparii fetta pe fetta.
Santa Zitta e Tommaseo
co-i sœu orti de verdûa
son cormæ zà tûtti a rëo
e nisciûn ciù se ne cûa;
Zena mæ antiga e bella ecc.
Aöa gh'è de nœuve stradde
con 'na gran lûminasion,
gh'emmo o Porto, co-e caladde,
gh'emmo a Circonvallazion,
A Çittæ a l'è vegnûa grande,
l'è aumentôu i sœu çittadin,
ma o mæ chœu o se strenze, quande
penso a tûtte quelle fin!
Zena mæ, antiga e bella
mi t'ho sempre in to chœu
per mi ti ê sempre quella
che ho visto da figgiœu!