Spinora 1781
| ←vanni a-i atre vitoie | In lode dro signor Pietro Paolo Spinora Cantilena |
| Exemprâ conservao inta Biblioteca Universcitaia de Zena. |
IN LODE DRO M. NOBILE PATRIZIO
RO SIGNOR
PIETRO PAOLO SPINORA
Capitañio Comandante dro Pinco nominaò
N. SIGNORA DEL SOCCORSO
E S. LEONARDO
Pe ra preiza fæta d'uña Galeotta Barbaresca
con trenta Turchi, e repiggiaò un Pinco
de Sori ro giorno 7. di[sic] Settembre, e
conduta in questo Porto ro giorno
17. di[sic] Settembre 1781.
A RO POPOLO ZENEIZE.
Muza? Muze? intremmo in ballo,
Versi, e veña per cantâ,
Ri Zeneixi fan gran sciallo
Pe ra preiza dro Corsâ,
Che partio s'era d'Argê,
Ma o non torna ciù in derê.
2
Che se cante allegramente
Viva Spiñora Pedrin,
Ommo bravo, ommo valente,
Cavaliero illustre, e fin.
Vero oxello dell'Amâ.
Se fa temme, e se fa amâ.
3
Destinaò pe ro comando
Dro Vascello dro Soccorso,
In Mariña rondezando
O faxeiva ro sò corso;
Per tegnî netti i contorni
Da ri Turchi perdi giorni.
4
Quando a tempo o fu avisaò,
Che da grossa Galeotta
L'era zà stæto atrapaò
Un bon Pinco; e a quella votta
Là d'Argê se ro portava
Remorcando, e o strascinava.
5
Pin de poira i marinæ
Da sò bordo, con ro Schiffo
Eran zà tutti scappæ,
Che, o Patron disse, me a sbiffo,
E con tutti i sò Canoin
O se a feçe intr'i Caazoin.
6
Sentío Spiñora sto fæto
A ra Meistra, e a ro Trinchetto
Cassa sscotta, e dito fæto
O gh'attende ro sorchetto:
Gente, attenti, stemmo all'ærta
Sciù ra Coffa a fâ scoværta.
7
Per doî giorni verezando
O ghe dè continua caccia,
Che ro Turco via scappando
O schivava mostrâ faccia:
Ma o l'aguanta, e zù abordosso
O l'investe, e gh'intra adosso.
8
Trenta Turchi van a bagno,
Che nuavan comme Ræne,
Facce da Simon do bagno
Che criavan, Ajutæne!
Noi morir tutti negara!
Bon Cristiani perdonara.
9
Ma ro bravo Comandante
De bon cœu, da bon Crestian
O çercò, che ognun s'aguante
A o sò bordo, e ghe dè man,
Perchè se possan sarvâ,
Che o no i voeu lasciâ negâ.
10
Ra Galeotta è a picco, a fondo,
E ro Pinco resta Preiza;
Ma quarc'un goffo, e riondo
Dixe questa è poca impreiza.
Invidiosi, e con strambotti
Van taggiando dri capotti.
11
Daggo a târa a queste Ciffe
Che han ra lengua tutta guæra,
Se poi s'intra in Taffe, e Tiffe
Mettan lesti pansa a tæra,
Per sarvâ (Dê ri benighe)
Ra sò pansa pe re Fighe.
12
Comme l'è finío l'intrigo
Che son çerti dra vittoria;
E che non gh'è ciù perigo
Sâtan fœura a fâ bardoria,
Con ra lengua franca, e lesta
Se fan lô patroin dra Festa.
13
Pedrin ha stœumago, e peto:
Non parolle o fà, ma fæti,
E coscì o se ne sta quieto,
Che per lê no ghe son cæti;
E o se misso in un posesso
De no fase fâ un processo.
14
Se ghe dagghe uña Fregatta,
O Galera, o bon Sciabecco:
O farà sempre regatta
Con ro brutto Turco becco,
Pronto a daghe uña vernixe
Con scciapaghe re cornixe.
15
Se ghe molle un pô ra brilla,
Co s'accoste in Barbaria:
Vedereì co scialla, e axilla,
E ben preflo o marcia via:
E o ne porterà con lê
Tunexin, Trippoli, e Argê.
16
A bon conto, in righinaggia
Van ri Scciavi là a Paraxo;
Che n'ha fæto uña ligaggia
L'Agozì meistro Biaxo,
Con ra sò sammara in dosso
E Calotta in panno rosso.
17
Presto presto tutti quanti
Abranchæ anderan per Zena,
Scriti in Darsena Mercanti,
Ra secante cantilena
A criando chì, e là,
Bona Aringa, e Baccalà.
18
Dunque, Muze, andæ cantando
Con bon gusto, e con impegno;
De Coroña, e de comando
Viva Spiñora Ommo degno,
Re sò laude meritæ.
Viva Zena in Libertæ.