Ro Chittarrin/Ro scorroççamento de Gian Rua camallo da carbon

Da Wikivivàgna
Sata a-a navegassion Sata a-a serchia
Ro Chittarrin, o sæ strofoggi dra muza de Steva de Franchi
Ro scorroççamento de Gian Rua camallo da carbon


[p. 47 modifica]
RO SCORROÇÇAMENTO

DE GIAN RUA
Camallo da carbon, con
MINETTA MININI

Revendeirœura de Fossello.


Minetta, no gh'è mondo,
Per mi zà ti hæ finío.
Va via, te diggo addio.
No me stâ ciù à çercâ.
Ti fæ papê con Giacomo,
E mi m'agguanto à Tonia;
E sì no mondo nespore:
A l'è patt'e pagâ.

2
Subito che t'ho visto,
No nego, e ro confesso,
Che fin à rosto, à lesso,
Saræ andæto per ti.
Ma in giro comme un ghindaro,
Comme fœugge dell'arbora,
Se ti ti cangi genio,
E così façço mi.

3
Mille votte t'ho dîto,
Che in trappa ti me stagghi,
E che ti non ghe vagghi;
Ma ho buttao via ro sciao.

[p. 48 modifica]

Pù tanto là int'ro fondego.
T'ho visto de Sozzeivera
À beivetene uñ'amora
Con Giggio ro scciappao.

4
À ra mattin per tempo,
Faççando gibriella,
T'ho visto fâ dra bella
Con quello scarlafon.
Se poessan parlâ libero
Re caze, ville, ri ærbori,
Direivan senza dubio,
Direivan ch'ho raxon.

5
Donca se te ghe cianto
Giusto sciù ra parmæra,
No me stâ à fâ bombæra,
Con dîme traditô.
Che mi ghe prego un cancaro,
Chi ghe rozigge o stœumago,
À chi desfè ro callaro
Dro nostro primmo amô.

6
N'occôrre che ti cianzi,
Che attorno ti me giri,
Che pe ri tò sospiri
Non me lascio recræ.
Non sento re tò lagrime,
Non veggo re tò smorfie,
Son sordo à re tò smanie,
Re oregge son tappæ,

[p. 49 modifica]


7
Non ghe sperâ, Minetta:
Me scordo tutt'affæto
L'amô chi gh'è zà stæto,
Me scordo i nostri dì.
Ti và con ro tò Giacomo,
Mi vaggo con ra Tonia.
Minetta, no gh'è mondo,
Zà l'è finía per ti.