Rime diverse in lengua zeneise/Vorcan chi a puzzo, tento de carbon
| ←E za che ti te mostri mé inemigo | Rime diverse in lengua zeneise de Vorcan chi a puzzo, tento de carbon |
Déve tutti bon tempo, puoe che vei→ |
| acento grave = vocale curta - acento aguçço = vocale longa; clicca o nummero da paggina pe 'n rafronto co-a transcriçion diplomattica |
Vorcan chi a puzzo, tento de carbon
Sozzo como un diavo, per moggié
Havé Venere bella che d'in cé
Porze intro fá dro dì lume chiù bon
Questa, trattando quello da un craston
E assé chiù pezo, pe ro corpo mé
Fava che Marte chi dre guerre è dé
Ghe metteiva re corne a ogni saxon,
Ro Só chi tutto vè, zò che se fa
Visto quest'atto tanto deshonesto
Un giorno ro bon rango n'avisà,
E lé lassando ogni lavó zè presto
Per acchiapari, e in man solo o portà
Ro martello, per faghe havei dro pesto.
Ma Marte visto questo,
O se ne fuzzì via da varent'homo
Senza aspettá de dí, ni che ni como.
Si che quello bon homo
Re suoe vendette à sò vorei no fè
Ma meschinazzo à pointo como o poè.
Che ro martello o trè
A sò moggié, chi se n'andava assì
E per camin ro mannego n'insì,
De gratia noté chì
Ro martello così desmanegao
Ghe dè intra panza, e ghe restà attacao,
Ro mannego restao
Senza martello, cormo de doró
Con i homi s'accordà per servitó;
E però chin d'amó
Quando o vè donna bella, o stà in cervello
Ch'o se crè che a sé quella dro martello,
Ma o l'ha puoe gran fragello.
S'o vè che drento o no ghe posse intrá
E con ro primo sò patron torná.
De chi nassuo me pá
Quello proverbio chi se dixe ogn'hora
C'ha martello cascun chi s'innamora.