Ra cittara zeneize 1636/Oh' che Stelle, oh' che Ce: che má de læte
←torna a l'èndexo | Ra cittara zeneize de Amoî Mainæschi |
Questi corpi de fossina si netti→ |
Zena, Gioxeppe Pavon, 1636 In corscivo e ligatue. Gh'amanca i acenti aguççi. |
Oh' che Stelle, oh' che Ce: che ma de læte
Maxinna, e chi vi moæ sciù ra scoraggia
Dra Lunna unna si bella serenaggia
Ri ære cosi doce, e si ben fæte?
Vegni à vei re giærette contrafæte,
Feri là come spegi intra muraggia;
Nò te retegne questo Can chì sbraggia,
Che re gente à dormi son tutte andæte.
Trà ra chiazza, e ri scoeggi ti viræ
Brilla d'amo ro sarago, e l'ombrinna
Treppa ri Muzaretti, e ri Oggiæ.
Fossia che in vei bruxa dentra marinna
Ri mæsmi pessi ti t'arrossiræ
D'esse contra Ballin cosi mastinna.