Poexie do Gioxeppe Peagallo/In öccaxion che o Rev. G. T. o l'andava a Turin a celebrâ a sò primma messa
| ←Pe-o ritorno do Rev. G. T. | Poexie de In öccaxion che o Rev. G. T. o l'andava a Turin a celebrâ a sò primma messa |
endexo→ |
che o Rev. G . . . T . . .
o l'andava a turin
a celebrâ a sò primma Messa
Sûnetto.
E ti scappi a Turin? Ma ti no sæ
Ch'oeiva sentî o tò primmo Itemisseste!
Che ti m'aveivi dito che vegniæ
A sentî a primma Messa a-e primme Feste!
E son queste e promisse che ti fæ?
E belle paole che ti dæ son queste?
Ah Pippo ingrato e sensa ûmanitæ!
Oh amixi sensa fede! oh tempi! oh teste!
O-o sò chi te ghe porta, o l'è l'amô
De quello beneit'ommo chi é scappôu
Dä Societæ pe no sentî de fô.
Via, vànnighe ti ascì, scappa da-o sciato
De questa brûtta Zena, e là arrivôu
Assottèrrite presto in noviziato;
Ma sacci che de däto
Ghe stan Maddre Tempesta e Paddre Tron,
Che ben de spesso fan tremmâ o barcon;
Sacci che in Çê gh'é ancon
Dell'ægua e da gragnêua chi te vegniä
Pe despëto in ti veddri a tempestâ;
Sacci che se da-o mâ
Ti væ lontan, ti t'avvixinn-i a-o Po,
Che a tempo e a lêugo o saviä fâ de sò.
Via, vanni a casa tò,
Cioè a dî in Convento: addio, mi t'abbandonn-o,
Te baxo pe baxâte, e te perdonn-o.