Piaggio M. - Poesie 1846/Varietæ/No ghe n'è ciù ûn dio de netto
| ←L'Insopportabile | Poexie de No ghe n'è ciù ûn dio de netto |
E Convenienze→ |
| (ediçion Pagan - 1846) |
Figgi cai, mi no savieivo
Se m’inganne; e asci vorrieivo
Ingannâme, ma me pâ,
Che succedan ne-a giornâ
Troppo spesso çerte cose
Maliziose e disgûstose
Che fan di all’ommo chi è sccetto:
No ghe n’è ciù ûn dio de netto.
Nod è questo o lêugo, e o tempo
Da parlâne seriamente,
Ma coscì per passatempo
Ne parliö bûrlescamente
Per passâ a gnàgnoa, e per fâ
Quattro ciance da fugoâ.
Stæ a sentî, ma se ve tedio
Vortæ a carta, e gh’è o rimedio.
Eì ûn credito da schêuve
Arçicheprivilegiôu,
Dæ i pappê a quello Procûôu,
O ve dixe ch’o ve i schêuve;
O se fa intanto pagâ
A sentenza ancon da fâ.
Passa ûn anno, duî e treì,
Ma dinæ no ne veddeì;
O no l’ha ancon liquidôu,
Anzi o l’ha pregiûdicôu.....
E per cose quest’errô?
Perchè o Lô no mangia Lô.
Un m’impegna pe ûn so amigo
Per levâo da ûn brûtto intrigo,
O me fa mille romanzi
De so incette, guägni, avanzi;
Mi che son de bonn-a fede
Vaddo, breigo, impegno e fasso
Ma me tocca per mercede
De restâ in t’ûn imbarasso,
E piggiâ sciù ûn lavativo
Da tegnî fin che son vivo,
Perchè l’ûn e l’atro son
Duî Trampei de profescion.
Me desfasso per trattâ
Un affare bon chi premme,
Son d’accordo e zà me pâ
D’ëse læsto: tutt’assemme
C’ûnn-a scûza ingiûsta e sciolla
Cajo manca ä so parolla,
E mi perdo in t’ûn momento
Tûtto o frûto do mæ stento,
E bezêugna ancon che taxe!....
Ma me a piggio in santa paxe,
Perchè i ommi delichæ
No son boîn per fâ dinæ.
Ma lascemmo o lucrativo,
E vegnimmo a-o mangiativo,
Perchè chi gh’è ben da dî:
Mando in Ciappa, stæ a sentî:
A mæ Laica pe accattâ
Un pescetto, quattro ancioette,
Te g’asbrïan sciù de päzette
Tanto fresche da impestâ;
Per nasello te ghe dan
Un pittin de pesciocan,
E nêuv’onçe, a stâne ben,
Pe ûnn-a lïa quand’a ghe ven.
A l’andiâ da-o Pollajêu
Pe accattâ ûnn-a pollanchinn-a,
O gh’imbarca ûnn-a gallinn-a
E ghe a mette cose o vêu.
A mandæ da-o Maxellâ
Pe ûn pö de vitella bonn-a;
O ghe vende da scottonn-a
E per bêu, vacca derrûâ.
Mando in Darsena per vin,
O in te quello magazzin....
Ma lì ä nêutte se pacciûga
Per fâ vin sccetto senz’ûga,
Coscì accatto do veleno
O ægua brûtta per lo meno.
E tant’atri Bûtteghæ
Comme fan per fâ dinæ?
O Fideâ vende i fidê
Non ciù fæti cö panê
(Per no fâghe ûn atro callo
Doppo avei misso cavallo)
De gran teneo per gran dûo,
Coscì chêuxan de segûo
E mangiæ ûn pö de pastetta.
O Speziâ vende a risetta
Che a paghæ comme o rison.
L’atro o vende ä povea gente
Un pö d’eûjo de strasson
Comme o mëgio de Ponente.
Qnello o vende per milïa
E stravegio Piaxentin
Do formaggio chi fa a fïa,
Ancon fresco e cö scappin.
Questo o pan ve fa mangiâ,
Perchè o peize, chêutto mâ
Cö savô de pellisson.
E quelli atri do carbon?
Aoa portan çerti sacchi
Lunghi e stiggi comme bacchi,
Perchè fa danno a mezûa,
Ma ghe resta i mucchi e a pûa.
O Candeâ vende a candeja
Che gh’è ciù sevo che seja,
C’ûn stuppin zûarisoræo!
Chi a consûmma e a no fa cæo.
Quello Chêugo ?... ma taxemmo,
Perchè dunque s’angoscemmo.
Oh ma quanti, e quanti ben
Pastissê matricolæ
D’ogni genere, e Artexen
Vendan cose adûlteræ
E inricchiscian senza stento!
Chi ghe poëse vedde drento
Se metteiva ä testa e moen
E sbraggieiva, ghe scommetto:
No ghe n’è ciù ûn dïo de netto!
Poi ghe dieiva: oh brûtti chen!
E per cöse pe inricchî
Tûtte e cöse imbastardî?
Dov’a l’è a conscenza e o coêu?
E insegnæ ai vostri figgiêu
Tanti inganni e falsitæ
Sconosciûi da-i nostri poæ!
Vendeì cäo, bon pro ve fasse,
Convertî in argento e strasse,
Ma vendeì röba genuinn-a,
Perchè dunque o Sciö Reginn-a
O ve ficca in to Lûnajo,
Ma con tûtto o sò giappâ,
O sò dî, o sò predicâ
E e sò fâ da Miscionajo,
Ghe scommetto, che de çerto
O predichieiva a-o deserto.