Piaggio M. - Poesie 1846/Esopo Zeneize/O Roscignêu, o Fanetto e o Figgiêu

Da Wikivivàgna
Esopo Zeneize de Martin Piaggio
O Roscignêu, o Fanetto e o Figgiêu
[p. 77 modifica]
FOA XLIII.


O ROSCIGNÊU, O FANETTO E O FIGGIÊU.


Un Roscignêu e ûn Fanetto,
Ean tûtti duî in prexon
In t’ûnn-a bella gaggia
Appeizi da ûn barcon.

O Roscignêu o passava
A raggia con cantâ,
Cacciando çerti trilli
Da fâ strasecolâ;

In casa e fêua de casa,
E gente che passavan
A quello bello canto
Co-a bocca averta stavan.

[p. 78 modifica]


A-o Figgio do Patron,
Asperto Ragassetto,
Ghe vegnì ûn giorno vêuggia
D’aveì quell'Oxelletto:

Da so Pappà caminn-a,
Se mette a fâ o sappin
Baxandolo, o ghe dixe,
Vorriæ quell’Oxellin.

Scì, cao, Pappà rispose,
Te o dö, ma ti l’aviæ,
Se in gaggia o bravo mûxico
Fra i dui ti distinguiæ;

O chinn-a a gaggia in tæra:
Eccoli chi, ti pêu
Çerne e piggiâ , o ghe dixe,
L’Oxello che ti vêu...

O i squaddra tûtti duî,
O vedde o Roscignêu
Co-e ciûmme brûtte e scûe,
Quello piggiâ o no vêu;

O vedde incangio e belle
Ciûmmette do Fanetto:
Scialla! o l’è questo, o dixe,
O bravo mûxichetto;

O l’arve a porta, ö piggia ,
Ma appenn-a o l’è sciortïo,
O Roscignêu d’in gaggia
Ghe caccia ûn barbacïo,

E o canta çerte notte
Flebili e delichæ ,
Che paeiva ch’o dixesse:
Un torto ti me fæ.

[p. 79 modifica]


A vedde o Figgio allöa
Pin de verghêugna e raggia
Ammiâ fisso e confûso
L’atro Oxelletto in gaggia,

Giâse a-o Pappà cianzendo,
Chi rieiva a ciù no dî,
Ma che o ghe disse: Figgio,
Impara e sta a sentî:

Non creddi all’apparenza,
Perchè a te pêu ingannâ,
E da-o vestî ch’o porta
L’ommo non giûdicâ.