Piaggio M. - Poesie 1846/Esopo Zeneize/O Gallo, a Vorpe e o Can

Da Wikivivàgna
Sâta a-a navegaçión Sâta a-a çèrchia
Esopo Zeneize de Martin Piaggio
O Gallo, a Vorpe e o Can
[p. 79 modifica]
FOA XLIV.


O GALLO, A VORPE E O CAN.


Un Galletto insemme a ûn Can
Fèn ûn viaggio per Milan;
Verso seja se fermòn
Per dormî, ma no mangiòn;
Montò o Gallo sorve ûn Pin,
E de sotto stè o Barbin;
Ma in ta nêutte ne-o sentî
Fâ ogni pö chichirichî:
O l'è o Gallo, disse affiandose
Unn-a Vorpe, e perleccandose
A l’andò ciannin ciannin
Sotto quello erboo de Pin:

[p. 80 modifica]

E a ghe disse: O to cantâ,
Bello Gallo, o m’ha incantôu;
Mi te vêuggio un pö baxâ....
Chinn-a zù ... Son chi serrôu
(Ghe rispose o Gallo); addescia
O portê, chi è sotto o Pin,
Perchè o m’arve .... quella nescia
A o ciammò, sciortì o Barbin,
Che in t’ûn attimo o a scannò,
E o compagno o liberò.

No bezêugna mai dâ mente
A-o parlâ de çerta gente,
Tanto ciù quando ve dan
Dell’incenso, perchè o fan
Comme a Vorpe pe ingannâ,
Nè bezêugna all’occaxon
Mai lasciâse spaventâ
Da chi è forte e mascarson;
Ma politica ghe vêu,
E mostrâ d’avei do coêu.


Piaggio46-11.gif