Piaggio M. - Poesie 1846/Esopo Zeneize/O Cavallo, o Bêu, l'Agnello e l'Aze
| ←O Gallo e o Diamante | Esopo Zeneize de O Cavallo, o Bêu, l'Agnello e l'Aze |
A Sigaa, o Grillo e l'Ava→ |
Quattro bestie d’ûmô differente,
Un Cavallo sûperbo e arrogante ,
Un Agnello mansûeto e paziente,
Un Bêu grosso con aja importante,
E ûn bell’Aze di ciù stramezûæ
Se trovòn fra lô insemme affammæ;
E corrindo d’in bosco in deserto,
E chinnando d’in monte in ciannûa
Comme o Lô, ma con passo ciù çerto,
Tûtti andavan çercando ventûa
Per trovâ qualche cosa addattâ
A-i so denti de poeì roziggiâ;
Stanchi e frûsti da tanto cammin,
Dä gran famme arraggiæ comme chen,
Finalmente da lonxi scrovìn
Unn-a villa in t’ûn grasso terren,
Pinn-a d’erboi, de vigna, e de biava,
C’ûn gran campo de fen ch’incantava.
Da-o piaxeì tûtti allegri e contenti
Camminavan, che paeivan giganti,
Perleccandose, e affiando zà i denti,
Ognûn voeiva arrivâghe ciù avanti
Per levâse o roziggio da-o coêu,
E saziâse do megio ch’o pêu;
Gh’arrivòn , ma restòn ben mincioîn
Quando viddan sta villa mûäggiâ
Da ûn gran zerbo de brûghi e spinoin,
Da ûn fossôu tûtt’intorno allagâ,
E che stava in sciä porta ûn Villan
C’ûn baston pin de gruppi pe-a man.
O cavallo de vedde o baston
O sentì un non so che in to so coêu
Chi l’angoscia, e ghe mette ghignon,
Passa a famme, e andâ avanti o no vêu;
L’Agnelletto pe-a puïa de bacchæ
O tremmava meschin criando bæ;
O Bêu stanco o fremmeiva, e impaziente
O pensava fra lê titûbante
S’o dovesse passâ.... ma prûdente
Riflettendo in sciö bacco pezante
O decise da asperto fra lê
De tornâ a denti sciûti inderrê;
L’Aze in cangio, sempre Aze e teston,
Senza ninte riflette e pensâ,
O fa un säto, e va incontro a-o baston...
O Villan se ghe mette a sbraggiâ:
«Vanni via , brûtta bestia, o t'ammasso»
Ma testardo o sta lì l’azenasso.
Quello prima ö minaccia... poi picca
Legnæ da orbi tra müro, e tra collo,
Ch’o fa sangue, ma l’Aze ghe slicca
Casci abbrettio, e va zù a rompicollo
In ta villa scrollando e bacchæ,
Che pâ manco ch’o e aggie piggiæ:
Intrôu drento o fracassa, o subissa
Da per tûtto co-e sampe ond’o passa,
E co-i denti o l’arranca, e menissa
L’ ûga, e o fen con a biava o pestassa
E çercando o ciù bello, e o ciù bon
Pâ, ch’o digghe: son mi chì o patron
Sazio e moscio o s’accuega in sce l’erba
E reverso o se mette a ragnâ
A-i compagni con aja sûperba,
Che cujosi o stavan a mïâ:
Imparæ, Potronassi, da mi,
Se fa sorte a sto mondo coscì.
