Piaggio M. - Poesie 1846/Esopo Zeneize/L'Erboo de Röve e o Costo de Mëli
| ←O Lô e o Bæ | Esopo Zeneize de L'Erboo de Röve e o Costo de Mëli |
A Pegoa e o Can→ |
.
Un Röve antigo, ricco de giande,
Con tanti rammi, e coscì grande
Ch’o l'arrivava co-a testa in Çê ,
Tutto sûperbia, e pin de lê,
Vedendo in tæra un costettin
De quelli belli Mëli piccin,
O disse in aja de compascion,
Ma sostegnindo sempre ûn gran ton:
O figgio cäo! cose ti pæ
In paragon di pari mæ
Coscì piccin, mi coscì grande!
Ti pochi mëli, mi tante giande!
Meschin! che stato! ti è disgraziôu!
Quando mi incangio son fortûnôu!
Rispose o Mëlo con ûmiltæ:
Mi te ringrazio da to bontæ;
Se a mæ miseja te dà fastidio,
A to ricchezza mi non invidio;
Mi son piccin, e ti ti ê grande,
Ma vä ciù ûn mëlo, che çento giande,
Che non da-o nûmeo, ma da-o savô
Acquista a frûta meito e valô.
Chi scrive e parla sempre gran lode non otten;
L’è megio scrive poco, parlâ poco, ma ben.
