Piaggio M. - Poesie 1846/Esopo Zeneize/A Sigaa, o Grillo e l'Ava

by Martin Piaggio

←O Cavallo, o Bêu, l'Agnello e l'Aze

Esopo Zeneize de Martin Piaggio A Sigaa, o Grillo e l'Ava

A Lûmassa e a Formigoa→

FOA XXIV.

A SIGAA, O GRILLO, E L’ AVA.

Un Grilletto e ûnn-a Sigaa
De Zenâ da-e Ave andòn
Affammæ, e morti da-o freido,
Letto, e töa ghe domandòn;

Promettendoghe a Sigaa
D’insegnâghe ben cantâ,
E o Grillin ballâ de sbalso
Per distinguise, e figûâ.

A moæ de Ave ghe rispose:
Ve ringrazio, amixi, tanto,
Ma n’importa, che e mæ figgie
Saccian ben o ballo, e o canto;

Mi me premme d’insegnâghe
Quello bello e bon mestê
D’ëse docili e inzegnose,
Fâ da seja, e dell’amê:

Con quest’arte in tûtti i tempi
No ghe pêu mancâ de pan,
Nè a piccâ, come voî atri,
Da nisciûn ä porta andiän.