 |
Questa pagina a no l'è stæta corretta. | |
Ger. Ti l’arviræ.
Mon. Benissimo.
Ger. Ti l’arviræ; e ti piggieræ quella ciave grossa, da a parte senestra, che l'è quella do mæ guardarobe.
Mon. Scì.
Ger. Ti piggeræ tutti i mæ vestî de dosso, e ti i andære a vende a o repeççin per rescattâ mæ figgio.
Mon. (ride) Ah ah ah. Creddo che stravaniæ! quando ne troverò un çento de lire de tutti i vostri abiti, saremmo a segno, e poi avanti che i agge vendúi o sarà zà in Barbaria.
Ger. Ma cose diavo o l'è andæto a fâ sciù sta gallera?
Mon. Queste son tutte parolle buttæ a o vento. Lascæ da parte questa gallera, e arægordæve, che o tempo passa, e che andæ a reizego de perde vostro figgio. (piange) ah povero mæ patron chi sà, se ve viò mai ciù in tempo de mæ vitta! e mentre che se perdemmo in parolle forsi o sarà zà sciù o cavo de Noli! ma o Çê me sarà testimonio, che da canto mæ ho fæto tutto quello, che ho possuo, e che s’o non sarà rescattaò ne sarà caxon o poco amô d'un poære verso so figgio.
Ger. Monodda, aspêta, vaggo a çercâ i dinæ.
Mon. Sbrighæve, che tremmo de poia, che passan e due ore.
