 |
Questa pagina a no l'è stæta corretta. | |
75
Guasco è ro quarto: apprœuvo l'è cavaoù,
Ridolfo: e pe ro sesto ven Rodrigo,
Ghigærmo Ronciglion settimo graoù:
Berardo de Baviera, e Monsù Arigo,
Guascon Rambaldo, pœuscia deventaoù,
Per sta Garçonna de Gesù nemigo.
Sta bonna peçça fu l'urtimo estræto,
Così tutt'è finîo: ro Lotto è fæto.
76
De raggia, e giroxia, d'invidia i denti
Strenzan ri átri, giastemman ra fortuña:
Amô, contro de ti fan dri lamenti,
Che ti g'hæ descciongiaoù ra cantabruña;
Ma sicomme dell'ommo i pensamenti
N'orreivan sette, se ne perdan uña,
Così per no stá a veì se nasce l'œuvo,
Vœuran seguî ra bella, e andághe apprœuvo.
77
Ra Filoña, chi vedde, e ch'a s'accorze,
Che ghe bogge ro cœu comme un lavezzo,
A ghe ne da çinquanta per quattorze,
Faççendo nasce fra de lô un ciarezzo:
Ro cavo a questo a molla, a quello a porze,
E de lasciâri a mostra l'ammarezzo:
Ma intanto vêgnan da Gofrè i Compæ
Per congedâse, tutti instivalæ.
78
Lê ri reçeive, e in atto de partenza,
O ghe fa sto pittin de predichetta:
Figgi cari ho da dîve in confidenza,
Che ra fe dri Paghen l'è maledetta,
Che lô son d'uña pessima semenza:
Sicchè stæ sorte, no me fæ gambetta:
Ma o parla a sordi: ognun liçenzia piggia,
E con ra bella mescian ra caviggia.
79
Tutta allegra ra birba d'esta preiza,
A se ne va con questi dexe avanti:
Aoura pensæ (ra sò partenza inteiza)
Comme reston monocchi ri âtri amanti.
Aspêtan, che ra nœutte sæ desteiza
Sciù ra terra, e a dormì sæen tutti quanti,
Poi ciancianin l'un dopo l'âtro aggroppa,
Sciusciandoghe d'amô ro vento in poppa.
80
Segue Eustazio ro primmo, e a maraspærme
O l'aspêtò i crepuscoli dra nœutte:
Lê chi aveiva in tro stœumego ro værme,
O no sa dâ a ra cosa tante dœutte:
(Cose all'ommo fan fâ çærte Ghigærmæ!)
Senza che ra fatiga ro rebœutte,
O va tanto, che o trœuva a uña cassiña
Con quelli pelladdoin ra sò Armidiña.
81
Quaccio, quaccio o s'accosta, e a ro sò andá
Rambardo ro conosce; pœuscia pronto,
Ghe dixe: Cose vêgni tu chì a fá?
Vêgno (o responde) se ho da dâ sto conto,
Armida mi con ri âtri a seguitâ,
E me craoù, ch'a m'avrà per un pan onto.
Replica l'âtro: E chi ælo, chi st'onô
T'ha dæto a ti? Lê ghe responde: Amô.
