 |
Questa pagina a no l'è stæta corretta. | |
61
Ma benchè a sæ de quelle schizzalœuggio,
E che dra so appellœura a ro reciammo,
A faççe fin vegnî pesci dê scœuggio,
Tirandori a dozeñe a ro sò lammo,
Benchè a sæ bella, benchè a l'impe l'œuggio
Con ra sò cera fæta a ro recammo;
A non arriverà però a fá scciavo
Gofredo, chi s'imbrigna dro diavo.
62
E l'ægua, e ro savon con lê a ghe pærde:
D'innamorâro a pœu avanzâ ra breiga
Ch'o l'è serraoù ciù ch'uña pigna værde:
L'orbo amô no l'imbratta, e no l'impeiga;
Ch'ommo dæto a ro çe no se despærde,
E a cose d'esto mondo o no se ceiga:
Sichè a pœu fá, a pœu dî, ma ch'a l'acciappe
In tro sò rattairœu, son tutte frappe.
63
Torçe a no ghe farà manco un cavello
Da ra stradda, che Dio gh'ha za prescrita;
A pœu tegnî de sotta ro cotello
Per tirâghe in tro cœu ra botta drîta;
Ma lê resiste a corpi de martello,
Lê non ha mai sentîo d'amô uña fita;
Re donne ghe fan speçie comm'un can,
O ghe sæen da vexin, o da lontan.
64
Questa, che co un'œuggiá lê se pensáva
De fá cazze ro primm'ommo dro mondo,
Aoura a deventa dro corô dra rava
Tutta raggia, e venin d'in çimma in fondo,
Perchè o ra cianta lì comme uña crava,
Così bezœugna, che ro mappamondo
A vôze per trovâ mêgio fortuña,
O mêgio ponto indeviná de luña.
65
Che chi no gh'è terren da fâ pugnatte:
A l'ha çercaoù d'invescigâ Tancreddo;
Ma lê o non è de queste añime ciatte
Sença onò, ni respetto, e sença creddo,
Chi vagghe a destanâ gatti, ni gatte,
Ni a l'ha posciûo afferrá per quanto veddo:
Lê solo o gh'è scappaoù per uña maggia.
Ma tent'âtri son cheiti in tra sò gaggia.
66
Temendo sta Brenolla, che a ghe posse
Ra cosa non ostante andâ fallîa,
Benchè a l'agge strinaoù ra porpa, e ri osse
A tanti bravi, a vœu portari via
Primma che veddan re scapolle grosse,
Che han fæto a innamoráse, e a te ri ghia,
Donde diran: No avesse conosciûo
Questa bella cazaña de vellûo!
67
Arrivaoù quello dì ch'o ghe promisse
Ro Generá de dághe dro soccorso,
A se ghe feççe avanti e lì a ghe disse:
Sciò, ro dì stabilîo l'è zà trascorso:
E se mai quello Turco descrovisse,
Che mi agge fæto a ri arme tœu recorso,
O se preparereiva a ra deffeiza;
E allora chì te vœuggio a fá l'impreiza.
