Pagina:Piggiâse o mâ do Rosso o cartâ.pdf/33

Da Wikivivàgna

Fal. Gh'intro sci scignor, perchè a m'ha perso ö rispetto a mi ascì, a m'ha dîto ammazza sette e strêuppia quattorze, a m'ha dîto che a me dà ûn mascön da fâme andâ co-e gambe all'aja, e a mi de ste cose no se ne dixe, e se sciâ no ghe mettiä rimedio voscià sö costreito a piggiâ e mæ determinazioin e fâme sovvegnî che son stæto militare, e a sciabbra a sò manezzâ.

Nic. E sciâ manezze, e sciâ tïe fêua sta maledetta sciabbra, che vedemmo comme a l'é fæta.

Fal. Sciâ, se creddieiva forse che no fosse ciù bon?

Nic. Sciâ saieiva bon a taggiâ da polenta.

Fal. Sciâ prêghe che sciâ l'é ûn ommo anzian.

Manin. Oh insomma finimola! sacci che ö sciô Falampi ö l'ha diritto de piggiâ e mæ difeise, perchè ö me deve spozâ... ö l'é ö mæ promisso.

Nic. (sorpreso). Ö to promisso lê?

Fal. Scì scignor, e saviö difende a mæ conquista co-a punta da spä... con tûtto ö mæ sangue.


SCENA XI.


PIPPO poi MANUELLO e detti.


Pip. (frettoloso). ûn momento... ûn momento... sciâ no se dâggan, sciâ no se dâggan.

Man. (di dentro). Sciô Pippo dove sciâ camminn-a?