Pagina:Piaggio Poexie zeneize 1846.djvu/366

Da Wikivivàgna

Bocca e coêu parliän assemme
S'apprezziä l’onô e a virtù,
Nè trionfiä i viziosi ciù,
No ghe sä ciù tanto lûsso,
Nè de povei tanto inflûsso,
Vegniä pigna o strallatton,
Generoso l'arpagon,
A modestia e fedeltæ
Vegniän ciù addomesteghæ,
Nè veddiemo che ommi onesti
E atri segni comme questi,
Che finn’aoa (se no son
Orbo ben) no veddo ancon,
Son ciù lunxi che a cometa!..

Ma no femmo ciù o profeta,
Un atr’anno, se campiemo,
Forse megio ghe veddiemo,
Pe aoa lascio stâ coscì;

Miæghe un pö voî atri ascì,
Piggiæ chi o mæ Cannocciale,
E gödive in lontananza
L'allegrezza da speranza,
Consolâne tûtti. Vale.