 |
Questa pagina a no l'è stæta corretta. | |
Cose ve lamentæ?
(Ghe disse ûn poveo Orbo chi i sentì
Argomentâ coscì)
Spëgiæve ûn pô in sce mi, dæme ûnn’êuggiâ,
Zacchè a voî atri mi no a posso dâ!....
Poi me dieì, se gh’è ciù ommo disgraziôu
E infeliçe de mi!....
No posso fâ dui passi de chì lì
Senz’ëse accompagnôu
O da ûn bacco, o da ûn can,
O da chi per caitæ me dagghe man !....
N’ho mai visto mæ Moæ, ni a mæ figûa,
Nè e bellesse che dixan da Natûa;
Comme saeivo contento
D’ëse comme voî atri in mæ zûamento!
Anzi vorrieivo aveì
Non ûn zembo, ma treì....
E davanti, e derrê,
E magära ëse rango da duî pê!....
Aomanco foise guerso,
Che veddendoghe, è intrandoghe per terso,
Porrieivo giudicâ chi ha ciù raxon,
Ma se no veddo ninte , che orbo son!....
Chi i so giorni tranquilli vêu passâ,
No conte quelli ciù de lê feliçi.
Ma quelli ciù infeliçi o pêu contâ.
