 |
Questa pagina a no l'è stæta corretta. | |
BEP. Sciä ghe dagghe o sciö Valerio
TOM. (con ira) Mia, n'ho vêuggia de bûrlâ
BEP. (risoluta) No scignor, o diggo in serio
Sciä l'é a causa do sò mâ
TOM. (trattenendo la collera) Via finiscila ciarlonna
Ti no sæ cose ti giappi
Vatte asconde, pelandronn-a
Vanni in sala a sarsî drappi
Se te sento ûn'atra votta
Nominâme quello lì
Ti sciortiæ co-a testa rotta
A parlâne fêua de chì
BEP. Scì scignor, sciä scûse tanto
Sciä a raxon de dâme a striggia
Taxo sûbito, ma intanto
Sciä se tegne lì sò figgia
Oh pe mi, sciä stagghe çærto
Che no vêuggio ciù parlâ
Sciä l'é ûn ommo troppo aspærto
Da doveilo conseggiâ (via)
TOMMAXO solo.
Oh scì, ti ë aspærta ti
Vanni, vanni, odasiosa , pettelëa
Son proprio quello mi
Che me lascio dâ paeì da ûnn-a camëa
E scì! perchè mæ figgia a se deslengua
Sta scemma a l'ha pensôu
Che mi a dæìva a ûn despiôu
Che o n'ha manco de cädo sotto a lengua
(come rissovenendosi)
A proposito... o mëgo o l'é de là
Sentimmo cose o dixe ... cose a l'ha
(s'incontra con TIRITOFOLO)
