 |
Questa pagina a no l'è stæta corretta. | |
31
E doppo questo, ti pëzo che un can,
Ti me lasci coscì, ti te ne væ?
Ti sæ comme me trêuvo, e manaman
Un riguardo ti æ avûo pe-i caxi mæ?!
Aöa quanto t'é birbo tûtti o san,
San che ti te zûghiësci Cristo a-i dæ;
San.... ma cöse san mai?... so sölo mïe
A mæ desdiccia!... e ancon m'addento e dïe....
32
Penn-e d'amô! quanto seì crûe e amäe!
Che agitazion! no son nè in mâ nè in tæra;
Me sento portâ a l'äja, e non ho äe,
Ho bezêugno de paxe, e son in guæra!
Doviö forse scciûppâ comme e çigäe?!...
Me sento proprio o coêu che-o se me særa!...
Coscì, razza de can, ti me pêu affrizze?!...
Se vedde ben che ti é nasciûo d'Anchizze!...
33
Se sâ ascì che ûnna vacca l'é to moæ,
Che doppo o çibbo, a l'ha sempre ciù famme....
Che coronn-a a l'ha misso a-a so meitæ!...
Coronn-a che-a non ëa de rêuse e ramme...
Se sa che da parenti scavissæ,
No ne pêuän derivâ che pelle gramme!
Son frïta! comme o mæ, no gh'é dô pægio!...
Començando da-o coêu, o me piggia o rægio!!...
34
Pe-a to gran cattiveja, son restä
Derelïta e astrûnnä comme a campann-a!
Son comme ûnna menestra senza sâ,
Comme strapunta che-a l'ha perso a lann-a!
Per ti, ingrato! no fasso che sospiâ
Tûtti i giorni e l'intrega settemann-a!...
Addio grandessa! addio splendô de córte!...
Posso andâ in san Zenexo a vende tórte!!...
