 |
Questa pagina a no l'è stæta corretta. | |
19
Ciú fïto o l'ëa ciantotto e quaddro a schenn-a,
A-o collo o l'aiva a cuiga comme ûn fratte:
In punto d'appetitto, o l'é de venn-a,
E-o sacchezzieiva un campo de patatte:
E con questo so bëlo de balenn-a,
O l'ha d'idee ch'én stravaganti e matte;
O læte o mesccia insemme co-a frïtâ,
E-o ve mangia o mosciamme co-o cûggiâ.
20
In ti so moddi o l'é poco decente,
O se serve de dïe pe forçinn-a,
E con e moen, ch'én sempre brûtte e tente,
O ve magnûsca a serva chi é in cuxinn-a...
O dava a berta a-a figgia do manente,
Promettendoghe o sciallo e-a cappellinn-a...
Portôu pe-a crastatûa, a quanti gatti
Ean ne-contorni o dava i so recatti!!...
21
Tûtto o giorno o l'ingorfa, o lappa, o pippa,
E sempre o ve delûvia, e sempre o lappa:
In forma d'un ballon ghe cresce a trippa,
Se-o veddesci! o l'é riondo comme un pappa:
Valente dilettante o l'ëa de trippa,
E ne-i mortoi, o se metteiva a cappa:
Quando capita, o l'é ommo de ripiego...
Maxellâ, pastiççê, becchin e mego !....
22
Per lê, d'inzegno o no n'aveiva zimma,
Ma no-a creddo desgrazia in questo mondo:
Che sempre i ciù balordi stan in çimma,
E chi ha ûn pittin d'inzegno cazze in fondo...
L'inzegno o ve roziggia comme a limma,
E o ve rende ciú fragili che ûn tondo,
Ma l'ommo che-o l'é bestia e pin de lê,
O piggia forsa, e-o se solleva a-o çê....
