Pagina:Noberasco.Antologia.1930.pdf/25

Da Wikivivàgna
— 27 —

Gren diletti se ne amae:
Pastoì semo, donne mae.

Sotta i erbori, contenti,
Con voi, donne, balleremo
E a ra nêutte döçementi
Strenze ì eûggi ve faremo,
Che noi ätri gûsteremo
D’ogni commodo che haggiae:
Pastoî semo, donne mae.

Se ro leto é dûro assae
Onde, belle, noi dormimo,
Çitten semo delichae,
Che in montagna ghe godimo,
Ra durezza compatimo
Per sta freschi aora de stae.
Pastoî semo, donne mae.

Ni de çimexe hemo poira,
Ni de pruxe se ghe sente,
Che ogni dí con ra spazzoira
Nettezemo intregamente,
Che con noi allegramente
Virerei, se ghe restae.
Pastoî semo, donne mae.


A ra S.ra Dorothea Spinnora Gentí


Se Paris, con ro pomo d’oro in man,
Chiû a daro foisse, ro dareiva a voi
Pe re bellezze chi resprende in voi
E re virtû chi gratia ancon ve dan,

Che d’ogni parte so che illustreran
Ri secoli avegní con tûtti noí,
Che, inghirlandä de perle d’oro e scioi,
Re bionde trezze seû coroneran.

Se leze che crudele fû Medea,
Ma tanto chiú benigna fû Giunon
E valorosa ra Reginn-a Anthea.