 |
Questa pagina a no l'è stæta corretta. | |
Nato a Savona nel 1883. Nipote del precedente e compilatore della presente Antologia. Storiografo, professore e direttore della Civica Biblioteca.
Gh’è tanti che no conoscian sò poae e ciù tanti ancon che n’han mai visto ûn bigetto da mille, ma tûtti a rëo conoscian ûnn-a brûtôa: a mosca. A conoscian tûtti: grendi e piccin, maiae e fantinaeghi, bestie e cristien. A conoscian tûtti, perchè o mestê de quell’angosciosa o l’è quello de rompî o chitarrin a tûtto o mondo ciù ûn caroggio.
Ho sentïo de votte distingue tra-a mascarsonaia da prüxa de cristian e quella de can e no se saiva quae a fuisse pezo. Ma a mosca, mae cäi, a l'è paigia pe tûtti. Sta sciarbella a rappresenta l’uguaglianza e dieiva, anzi, o socialismo.
A l’è ciù finn-a che a vorpe: a l’ha di êuggi che sgarban: a vedde tûtto: dai cobelletti do speziâ, ai tosci da rûmenta. A vedde tûtto e, da bestia gorfonn-a, a s’attacca a tûtto. Pe le a saiva intoescegâ da pettelëa a va tanto comme a cremma de ûnn-a meringa.
E testarda, sei, quella bestiazza! Pe mi a l’è o veo campion do carattere. A mandae a quello paise a scciaffi, a pattoin, a mandillae: ghe tiae zù ûn vocabolaio de giastemme. Stae freschi! Con ûnn-a costanza da galêa a ve ritorna çinquanta votte in to maeximo lêugo. Ghe l’ei testa?
Pe-a mosca o no gh’è segreti: a trovae dappertûtto comme l’äia, comme i tacca pomelli. E dovunque a vagghe quella scorlûssoa, a fa conto d'ëse in cà sô. Stae segûi: no troviei ûnn-a faccia onesta e manco ûn panno de cicciollo, ma troviei sempre quella bestia.
