Pagina:Meistro Tacco pe a gran Sciortia 1833.pdf/4

Da Wikivivàgna

(2)

Çinque anni son per bacco! che staggo in to cadeon
E in compagnia di ratti façço conversazion
Sempre aspëtando o giorno de remesciâ un pö a püa
Per fâ deneûvo a Zena sciortindo a mæ figüa:
Quest'a l'è quella votta dunque che resveggiôu
Da-i bravi Foxinanti son da-o Tacchin scappôu;
Scappôu da quella pussa, da quello brutto imbûo,
Dove quarche cæebella appen-na a rompe o scûo;
Con l'obbligo, s'intende, poi de tornâ a creppâ,
Quando aviö visto tutto quello che veûggio ammiâ.
Ho inteizo che per Zena, e mascime in Portoja
Fa maume strepitoze, magnifica bardoja:
Che apparan de damaschi teiti, carroggi, e ciasse
Quest'anno un-n'atra votta pe-a megio de Cazasse;
Vêuggio dî de Foxin-ne, de quelli bravi Fræ,
Ch'han sapûo spende a tempo paole, pappê, e dinæ.
Mi comme Cazassante, Zeneize appascionôu
Per vedde questo sciato dä Foxe son scappôu,
E vegno.... ma cos'ælo lazzù quello mormoggio
De gente, che a balocco veddo sboccâ o caroggio?
Scialla!.. oh mia chi! per bacco! eccola a l'è chi lê,
Sento sunnâ a catubba, za veddo i Granattê;
Gh'è a Banda d'Aosta: presto, fito abbassæ i capelli,
Che posse vedde, e göde mi ascì di ritornelli,
Silenzio, che conmençan... oh belle scinfonie!
Ciocchæghe... a queste scimili mi non n'ho mai sentie.
Miæ un pö quelli giganti, che portan i papali,
Magnifici, stupendi, superbi Pastorali;