 |
Questa pagina a no l'è stæta corretta. | |
Ûn ätro anno in sciö zembo!
Ma l'ommo stando a töa,
l'anima o se resciöa
sensa pensâ a-o doman.
Doman, o l'é l'incognita,
e o l'é l'indovinello:
o in çê comme ûn öxello,
o verme in to pätan.
L'é sciollo chi se crûzia
apprêuvo a sta sciaradda:
l'é mëgio fa a so stradda
senza affannâse o chêu.
Ûnn-a bottiggia bonn-a,
ûn bon sigàro e o gotto
son comme ûn terno a-o lotto....
gödimmosela anchêu!
L'é vëo che sta bottiggia
a costa çinque lïe...
ma se a me fà ûn pö rïe,
a no l'é troppo cä.
